Khang lynti ki Karbi ïa ki Khasi kiba sah ha Block-I ban leit thied dawai bad leit ïew

Shillong, Jymmang, 31: Ka Hynniewtrep Border Dispute Redressal Forum (HBDRF) ha ka sngi Balang ka la ujor sha u Chief Secretary ka Jylla u Bah Donald P. Wahlang halor ka jingpakhang lynti jong ki Karbi ïa ki Khasi-Pnar kiba sah ha ki shnong kiba hap hapoh ka thaiñ Block-I.
Katkum ka jingïathuh jong u Chairman ka Forum u Bah Chandame Sungoh ba ki Karbi ki la pakhang ïa ka surok ha ka shnong Myn-i Umpawiang, kaba hap hapoh ka thaiñ Khanduli bad ha ka thaiñ Mukroh kaba mih sha Mookoilum Tibin bad Inghinlanso.
“Kane ka jingpakhang ki Karbi ïa ka surok ka long ban pynsyrtok ïa ki Khasi haduh ba kin pyndem hakhmat jong ki,” ong u Chairman ka Forum ha ka jingïakren bad u nongthoh khubor.
“La shah tang ïa ki shnong kiba hap hapoh Assam ba la sah da ki Khasi ban leit sha ki jaka ïew, hynrei ki paidbah ka jylla Assam bad ki nongshong ïew ha Assam kim ju thied shuh ïa ki mar rep na ki Khasi. Ki mar rep ba ki Khasi ki ju pynmih ki long kum ki jhur, ki syiar, ki sniang, u khaw bad kiwei kiwei. Kane ka jingkyntait jong ki briew na Assam ban thied ïa ki mar rep ka la buh jingeh ïa ka ïoh ka kot jong ki Khasi ha kaba ki ïakynduh mawsiang wat tang ban thied ïa ki marbam ban pyndap ïa ki jingdonkam ba manla ka sngi ïa ka ing ka sem. Nalor kata, ki Khasi ki ïakynduh jingeh haba leit wad jingsumar sha Hospital kiba don ha Assam na ka daw ka jingbym ïasngewthuh ha ka ktien ka thylliej,” la ong u Bah Sungoh.
Ha ka dorkhas ba la phah sha u Chief Secretary ka Jylla, ka Forum ka la pyntip ïa ki jingjia ha kaba ki Karbi ki la wiang ding ïa ki iing trep bad hadien kata la ring video bad pynsaphriang ïa ki video da kaba tei pop kylla ïa ki shnong Khasi da ka jingthmu ban pynjah burom ïa ki Khasi kiba sah ha Block-I.
U la ïathuh ba ka la don ka jingïakynduh hapdeng ki Deputy Commissioner bad Superintendent of Police jong ka West Karbi Anglong bad ka West Jaiñtia Hills District hynrei kane ka jingïalang kam shym la lah satia ban weng ïa ki jingeh.
“Ka jingïalang kaba la long ha ka 23 tarik mynta u bnai kam shym la lah ban shim ïa ka rai namarba ki shnong jong ka Khanduli ki dang ap ïa ka shithi na ka Karbi Anglong Autonomous Council (KAAC) ban pynpra noh ïa ka khyrdop khrong khajna (Entry Tax Gate) ha Khanduli,” la ïathuh u Bah Sungoh.
Une u nongïalam jong ka Forum u la pynpaw haba don kano kano ka sienjam ban ïapynbeit ïa kane ka jingïakynad kaba la neh da ki snem, ki Karbi ki ju mlien ban pynmih ïa ki jingkulmar.
“Ha u snem 1970-1971 bad 2002-2003 ka la don ka jingpyrshang ban ïakren pynbeit noh ïa ka jingïakajia pud, hynrei ki shnong Karbi ki la pynthuid kat haduh ba ki nongshong shnong Khasi ki la hap ban phet sha ka shnong Barato,”la ïathuh u Bah Sungoh.
Ka Forum ka la kyntu ïa u Chief Secretary ban tuklar lem halor kane kam mardor bad ban phah pynphai biang ïa ka Block-I sha ka Jylla Meghalaya.