Nongpoh, Ïaiong 28: Ki 6 ngut ki nongïalehkai Boxing na Ri Bhoi ha kane ka kynti kin leit ban mihkhmat ïa ka Ri Bhoi District na ka bynta ban shim bynta ha ka Meghalaya game ka ban sdang naduh ka 2 tarik u Jymmang haduh ka 7 tarik u Jymmang, 202 ha Nongbah Shillong.
Kine ki 6 ngut ki nongïalehkai Boxing ki kynthup 5 ngut ki dei ki samla Shynrang bad tang kawei ka rangaiehkai Boxing kan mihkhmat ïa ka Ri Bhoi na ka bynta ban leit aireng sha ka lympung ïalehkai Boxing jong ka Meghalaya Game ka ban long ha Nongbah Shillong.
Kitei ki 5 ngut ki rangïalehkai Boxing ki kynthup ïa u samla Willson L. Nonglait (51 Kg), u Samla Kapil Burman (54 Kg) u Samla Biangbok Umbah (57 Kg), u Samla Benjamin Nongrum (63.5 Kg), u Samla Precius Makri (67 Kg) bad ka samla Rikynti Marwein kaba dei tang marwei ka samla kynthei ban leit aireng sha katei ka lympung ban mihkhmat ïa ka Ri Bhoi District
Kine ki samla ki ban leit aireng lane ban mihkhmat ïa ka Ri Bhoi District sha ka Meghalaya Game ha Nongbah Shillong, ki dei ha ka jingpeit jingkhmih ka Ri Bhoi District Boxing Association bad ka Nongpoh Boxing Club.
Haba leit shim bynta ha katei ka ryngsan ne ka lympung ïalehkai Boxing ha Nongbah Shillong, kin don ruh ki Official ban synrang lang ïa ki ba kynthup ïa u samla Denis Marwein bad ka Samla Mercia Dohling lem bad u Bah Sumarlang Swer, President ka Ri Bhoi District Boxing Association.
Na ka liang u Bah Sumarlang Swer, u la ong ba na ka liang ka Ri Bhoi District Boxing Association bad ka Nongpoh Boxing Club ki la shim khia ban ai ka jinghikai ne ka jingpynkhreh ïa kitei ki samla shuwa ba kin aireng ha katei ka Meghalaya game ha Shillong bad kum ki bor pynïaid ki kyrmen skhem ruh ba kine ki samla kiba la ai jinghikai pyntbit ïa ki kin sa lah ruh ban wan rah ïa ka nam jop kaba long ka burom ym tang ïa ka Ri Bhoi bad ka long ruh ïa ka jylal hi baroh kawei.
