Shillong, Ïaiong 28: Ka HYC Mawlai Umjaiur Unit ka la pynlong ïa ka lympung ïalehkai phutbol na ka bynta ki khynnah skul kaba ki la ai kyrteng da ka phangpdeng, ban ong em ïa u drok bad hooid ïa ki sport (Say no to Drugs yes to Sports) ba la pynlong ha madanheh mini stadium, Mawlai Phudmuri ha ka sngi Balang ka 27 tarik u Ïaiong, 2022.
Ïa kane ka lympung ïalehkai la tip kum ka Tirot Sing Syiem, Mawlai Inter School Football (Knock Out) Tournament 2022. Haba plie pyrda ïa ka jingïakhun ha kane ka sngi ka OM Roy HSS B, Mawlai Kyntonmassar ka la jop ïa ka May Queen Secondary School, Mawlai Nongpdeng da 3-1.
Ha kane ka lympung ïakhun ki don baroh phra tylli ki kynhun ba la ïa shim bynta ba la phiah ha ki ar kynhun, ka Group A ba kynthup ia ka OM Roy Memorial Higher Secondary School B, May Queen, ka Don Bosco SS, Nongkohlew bad ka 1st MLP Battalion Secondary School, Mawiong, katba ha ka Group B, ka kynthup ïa ka St. Anthony HSS, ka PFR Academy, ka St. Francis, Mawlai Kynton Massar bad ka O.M Roy HSS A.
Ha kane ka sngi sdang la ïa don lang u President ka HYC Mawlai u Bah Donboklang Kharlyngdoh, uba long ruh u vice president ka HYC Sengkmie, ki dkhot ka HYC, ki nonghikai, ki khynnah skul bad kiwei kiwei.
Ka jingïakhun kaban wan kan long hapdeng ka OM Memorial HSS A pyrshah ïa ka St. Francis, Kyntonmassar kaban sdang ha ka por 1:30 baje nohphai sngi.
