Riangdo, Ïaïong 27: Ki sordar shnong na ki phra tylli ki shnong kiba don ha ka thaiñ Shilliang Wahblei, kaba hap hapoh ka Mawshynrut Civil Sub Division, ha ryngkat ka jingsynranlang u MLA ka thaiñ u Bah Gigur Myrthong, ha ka 27-04-2022 ki la leit ban ïakynduh ïa u Myntri Rangbah bad kumjuh ïa u Symbud Myntri Rangbah ka jylla, ban pynsngew halor ka jingeh namar ka jingshah iehbeiñ jong ka thaiñ mynta la da ki phew snem naduh ba la ioh ïa ka jylla ba pura.
Ha ka dorkhas ba la phah sha kitei ki ar ngut ki Khlieh nongsynshar ka jylla, na ka liang ki nongsynshar shnong katei ka thaiñ ba kynthup ïa ka shnong Thaiem, Mawkdep, Pyrden, Kyndangkdait, Mawkhar, Nongsleh, Mawsaw bad Tynrong Mawsaw, ki la pynsngew hakhmat u CM bad Dy. CM ba ka thaiñ jong ki, ka la shah iehnoh beiñ baroh shikatta ki snem, khamtam ka surok kaba long u budlum ha ka ioh ka kot bad ka roi ka par.
Ki la pynpaw ba ka surok ban pyniasoh ia ka thaiñ Shilliang Wahblei bad ka Ïew Riangdo ka jngai tang kumba 12 kilometer shiteng. Hynrei naduh ba la ioh ïa ka jylla ba pura, ym pat shym la don satia ba peit ba khmih ïa ki, ha kaba wat ban leit sha Ïew sha hat ruh kim banse ki hap ban shong da ki trok kit dieng lada dei ha ka por tlang, katba ha ka por lyiur pat ki hap ban iaid da ka kjat na ka bynta ban leit siew leit tda ne wat ban kit ïa ki jingkit kiba khia.
Shuh shuh ki la pynpaw ba kaba kham sngew myllung ka long na ka bynta ki khynnah skul kiba hap ban ïaid da ka kjat haduh 5 bad 6 kilometer man ka sngi tang namar ka jingbym don ka surok ba biang.
Namarkata, ki la kyntu jur ïa u Myntri Rangbah bad Symbud Myntri Rangbah ka jylla ba kin sngew lem ban shna noh ïa ka surok na Thaiem sha Mawsyrpat kaba jngai tang 12 Kilometer shiteng. Kane ka surok ka dei ka ban pyniasoh ïa ka thaiñ Shilliang Wahblei bad kiwei pat ki jaka kiba hap hapoh Mawshynrut Civil-Sub Division.
La ïathuh ba ha katei ka jingiakynduh bad ki nongialam shnong na ki 8 tylli ki shnong kiba don ha ka thaiñ Shilliang Wahblei, na ka liang u Myntri Rangbah bad Symbud Myntri Rangbah, ki la kular ban shimkhia na ka bynta ban pynurlong ïa katei ka jingangnud jong ki paidbah nongshong shnong.
