Nongpoh, Ïaiong 27: Ka long ka jingai mynsiem, ka jingpynshlur bad ka nam ka burom ïa ka Ri Bhoi District, ha kaba ki kynhun samla na Ri Bhoi ki la wan rah ïa ka na ka burom da kaba ki la lah ban khur ïa ki takma na ka jingleit shim bynta ha ka State Level Karate Do Championship kaba la long ha nongbah Shillong.
Kane ka State Level Karate Do Championship kaba dei kaba la dep ban pynlong ha ka 23 tarik u Ïaiong 2022 ha Indoor Stadium ha Madanryngting, Shillong bad ka kane lympung la pynïaid da ka Meghalaya State Karate Do Federation (MSKDF) bad ba la ithuh ruh da ka Karate India Organization bad ka International Olympic Committee.
Ki samla na Ri Bhoi kiba la ioh ban khur ïa ka nam jop bad ka takma bapher bapher ka dei ha ka jingïalang jong ka Ribhoi District Karate Do Association ba la lam khmat da u Beerin Klein bad u Jomiwell Maring ka laioh ban ïalam 9 ngut ki rang bad ki thei ïalehkai ban ïa shim bynta ha katei ka lympung.
Lyngba kane ka lympung, wat lada kadei ha ka sien kaba nyngkong ïaki ïa kine ki samla ïalehkai, hynrei ki la lah ban wan rah ïaka nam bad ka burom ïaka Ribhoi District da kaba khur ïaki takma haki kyrdan bapher bapher.
Kiba la ioh ban khur ïaki takma haki kyrdan bapher bapher ki kynthup ïa u Samla Francis Makri u laioh ban khur ïa u Gold Medal haka jingkhia kaba 70 Kg, Aldrin Klein Gold medal haka jingkhia kaba 58 KG, Bothstar Klein Silver Medal haka jingkhia 58 KG, Harjohn Makri Gold Medal haka jingkhia 55 KG, Napoleon Klein, Gold Medal haka jingkhia kaba 30 KG Junior Boys, Kamika Timung Gold Medal haka Kyrdan 53 KG, Klara Klein Gold Medal haka kyrdan 53 KG bad ka Margherita Klein, Silver Medal haka kyrdan 48 KG.
Lyngba jong kane ka lympung lane ka rynsan ba ki samla ki la ioh ban sei ïa ki sap ki phong ha katei ka kam ïalehkai Karate Do, ka long ka jingkmen ïa ki khun samla ka Ri Bhoi kiba la khur ïa ka nam jop, namar na kane ka lympung ki la don ruh kiba la shah jied ban leit mihkhmat ïa ka jylla sha ka lympung ïalehkai ban long ha Pune ha bnai Jylliew ban sa wan mynta u snem.
