Nongpoh, ïaiong 27: Hadien ka jingïaid shaphrang jong ka lympung ïalehkai phutbol kaba shongshit haka thai Western Ri Bhoi bala pynïaid da ka Western Ri Bhoi Sports Association, katei ka lympung kala poi noh sha kaba kut haka jingïakhun phainal kaba la long mynta ka sngi hapdeng ka Umkynsier SC pyrshah ïaka Umlakro SC ha madan ïalehkai jong ka WRBDSA ha Patharkhmah.
La wan ruh ban sakhi ha katei ka sngi ban pynkut noh ïa katei ka lympung ïalehkai phutbor da u Bah Sosthenes Sohtun MLA ka Jirang Constituency kum u kongsan bad u Bah Isman Lyngdoh sirdar ka Umkynsir kum u symbud kongsan haka jingdonlang ki nongialam ka WRBDSA, ki nongïalam shnong bad kiwei kiwei ki riew rangbah ka thai.
Ha ka jingïakhun phainal ha katei ka sngi hapdeng ka Umkynsier SC pyrshah ïaka Umlakro SC ka jingïaleh kala long kaba ïakhaid bad itynnad bha kaba la pynshongshit ïaki paidbah bad ki nong kyrshan jong ki 2 kynhun, hynrei hapdeng ka jingïa khun ba jur ka Umkynsier SC kala ioh ban pynkhih nyngkong ïaka jar tang ha minit ba 9 jong ka kylla step bad tam ïa ka Friends United Patarim da 1-0.
Katba haka kylla miet ka jingïakhun kala nang kham shongshit bad kham itynnad shuh shuh namar ka jingïakhun tyngeh ba mar kylliang ban rah ïaka nam lahduh bad watla ki rangïalehkai jong ka Umlakro kila ïakhun dohiap ban pynphai ïa katei ka shi kol, hynrei da ka jingtbit ki rangïalehkai ka Umkynsier SC kim shym la ailad satia ba kan ioh pynphai haduh ba kut ka kylla miet ban rah syndon ïaka nam lahduh jong katei ka lympung lyngba ka shi kol haka kylla step.
Hadien ka bala pynkut ïaka jingïalehkai naka liang ka kynhun nongpynïaid jong ka Western Ri Bhoi Sports Associatio kala sam ruh ïaki khusnam ha katei ka sngi ha kaba ka Umkynsier SC kaba dei ka kynhun lahduh kala ioh ban rah ïaka song pisa kaba haduh T. 50,000/- lem bad ka trophy katba ka Umlakro SC kala ioh ban rah ïaka song pisa kaba long T.30,000/- lem bad ka trophy nalor kiwei ki khusnam shimet.
