Pynthikna ka Sorkar ba wan phai biang ka African Swine Flu

Shillong, ïaïong, 26: Ka tnat Animal Husbandry and Veterinary ha ka sngi Baar ka la pynthikna ïa ka jingsar ka jingpang African Swine Flu bad lyngba ka hukum ba la pynmih da u Lat ka Jylla, la pynbna ïa ka shnong Umshorshor, Umsning, Ribhoi District kum ka jaka ba kane ka jingpang ka la sdang.
Ka tnat AH & Vety ka la pynthikna ïa kane, hadien ba la ïoh ia ka kaiphod na ka North Eastern Regional Disease Diagnostic Laboratory jong ka tnat Animal Husbandry & Veterinary kaba don ha Khanapara, Guwahati la pynthikna ïa ka jingsar ka jingpang African Swine Fever ha Meghalaya.
Kum ka lad ban ïada, ban tehlakam bad ban rat dyngkhong ïa kane ka jingpang, katkum ka Section 6 bad Section 20 jong ka Prevention and Control of Infectious and Contagious Diseases in Animals Act, 2009, u Lat ka Jylla u la pynbna ïa ka shnong Umshorshor kum ka shnong ba kane ka jingpang ka la sdang.
Katkum u kyrwoh ba la phah da u Principal Secretary ka tnat AH & Vety, u GHP Raju, la khang ban shalan bad ban warnah ïa ki sniang sha kane ka shnong.
Ym shah ban sei ïa ki jingbam ne ki tiar kiba ïadei bad ki sniang na ki sem ne jaka ri sniang. Ki trai ki dei ban pynkhuid ïa ki jaka ri bad ïa ki sem sniang bad yn ym shah ïa kiba nabar ban rung sha ki jaka ri sniang.
La mana pyrshah ban sei ïa ki sniang bad ban pynkynriah sha kawei pat ka sem. Ïa ki kali yn shah ban rung sha ki jaka ri sniang tang ynda ladep pynkhuid bad ynda ladep synreit dawai.
Yn ym shah ïa ki breiw ban sei ïa ki sniang na sem la ki dei kiba dang im lane kiba la ïap na ka jingpang African Swine Fever.
Yn ym shah ïano ïano ban sei shabar ïa ki jingbam sniang ne ki tiar ba la don ha sem ïa kiba la suba ba ki sniang ki don ka jingïabit ïa ka jingpang African Swine Fever.
Ïa ki sniang ba la ïap yn ym shah ban sei na ki sem ba la ïabit jingpang hynrei dei ban pyndep beit hapoh ka sem lane ka Farm.
Lada jia ba ym lah ban tep ïa ki sniang, ïa ka kali ba kit ïa ki sniang ba la ïap dei ban leh da ki Agency kiba hap hapoh ka jingpeit jong ka District Veterinary Office kata ruh da kaba bud ryntih ïa ki kyndon.
Ïa ki sniang ba la ïap dei ban da tep ha ka thliew ba la jylliew bad ym dei ban shu bret madei mata sha ki wah, ki wahduid ne sha khlaw sha btap.
Hadien ba tep ïa ki sniang ba la ïap, ïa ka sem sniang bad ïa ka kali bad ki tiar ki tar baroh dei ban da pynkhuid bha da kaba synreit dawai lyngba ka jingbthah jong ki Veterinary Officers/Rapid Response Team (RRT).
Dei ban pynkhuid noh mardor ïa ki rud ki kiar jong ka sem ne ka Farm lyngba ka jingbthah jong ki Veterinary Officers/Rapid Response Team (RRT).
Ïa ka jingpynkhuid kaba hadien dei ban leh da ki nongri katkum ka jingbthah ki Veterinary Officers/Rapid Response Team (RRT).
Yn ym shah ban shohdoh sniang lane ban die ïa ka doh sniang ha ka Infected Zone.
Ym bit ban rah ïa ki jingbam ba la bret na thliew ing bad ki Restaurant ban leit aibam ïa ki sniang.
Ïa ki iew die sniang bad ïa ki jaka shohdoh sniang ha ki Infected Zone dei ban khang khyrdep mardor.
Ki District Veterinary Officer bad RRT kin sa peitngor ba kino kino kiba shong basah ha ki Infected Zone ki dei ban bud ryntih ïa ki kyndon kiba la bthah.
Ki shnat treikam kum ka Municipa, ki Dorbar Shnong, Dolloi, Rangbah Shnong, ki Nokma bad kiwei kiwei ki dei ban ïatreilangbad ki Veterinary Officers/RRT khnang ban ïada na ka jingsaphriang jong ka jingpang katkum ba la bthah ha ka Section 30 jong ka Act.
Kino kino kiba la bret ïa ki metïap jong ki sniang ha ki wah, ki pung, ki nala ne ha kino kino ki jaka ïa kiba la suba ba dei ki sniang ba ïabit ïa ka jingpang ASF kin shah pynshitom katkum ki kyndon jong ka aiñ bad shah daiñ kuna T.2000 hajar lane ki lah ban ngat ha ka jingshah set along kaba shi bnai lada jia ba kim lah ban siew ïa ka kuna katkum ka Section 33 jong ka Act.
Hapoh ka Section 40 jong ka Act manla u Competent Officer, Director, Animal Husbandry & Veterinary Department bad Veterinary Officer haba pyntreikam ïa ka aiñ ne haba leh ïa la ka kamram katkum ka jingkdew jong ka aiñ.
Ka tnat AH & Vety ka la khang ban wanrah ïa ki sniang nabar jylla bad ban shalan na kawei ka district sha kawei pat.
La khang ban kit ïa ka sboh sniang watla ka dei kaba la ïoh laisen ban shalan.
U Divisional Forest Officer, Wildlife Division kin peit ba kin ym don kino kino ki sniang khlaw kiba shah ktah na kane ka jingpang ha ki Infected Sone bad Surveillance Zone.
Ha kaba ïadei bad ki lad jingïada ïa ki Free Zone kiba don shabar ka Surveillance Zone, la bthah ba ki nongri sniang ki dei ban pynkhuid bha ïa ki sem sniang bad ïa ka Farm ri sniang bad ym dei satia ban shah ïano ïano ban rung shapoh ka Farm.
Dei ban khang ïa ki kali ban rung sha ka Farm ban kit ïa ki eit sniang bad kiwei kiwei ki tiar.
Ki nongri sniang kim dei satia ban pyllait shabar ïa ki sniang. Ym dei ban kit ïa ki sniang, ïa ka doh sniang na ki Infected Zone bad Surveillance Zones sha ki Free Zone.
La khang ruh ban kit ïa ka doh sniang na kiwei kiwei ki Zone sha ki Free Zone. La khang ruh ban shohdoh bad ban kit ïa ki jingbam ba la bret na ing bad na restaurant.
Ki nongri sniang ki dei ban shim ïa ki lad jingïada khnang ban khanglad ïa ka jingsaphriang ka jingpang na ki sniang khlaw, ki mrad ba la ïap bad na ki sniang ba shu shang sakma.
Dei ban peit bha ïa ka koit ka khiah jong ki sniang bad ban ai dawai wieh manla ka por bad kiwei kiwei de ki lad ai jingsumar.
Ka jingpeitngor ïa ka jingpang ASF kan dang ïai bteng tad haduh ban da pynthikna ba kane ka jingpang ka la khuid.