1.5 lak metric tonne buh thong ka Meghalaya ban pynmih ïa u Sying lyngba ka Ginger Mission

Shillong, ïaïong, 26: U Myntri Rangbah ka Jylla u Conrad Kongkal Sangma ha ka sngi Baar u la pynbna paidbah ïa ka ‘Ginger Mission” ne mishon rep Sying kum shi bynta ban kyntiew shuh shuh ïa ka kam rep shynrai ha kane ka jylla Meghalaya 1.5 lak metric tonne shi snem ha ki lai snem ki ban sa wan.
Ha ka jingpynbna paidbah da u Myntri Rangbah la sakhi lang da u Myntri ka tnat ka Rep ka Riang u Bah Banteidor Lyngdoh ha ka jingïalang kaba la long ha Integrated Agriculture Training Centre, Shillong.
Ïa mynta ka jingpynmih ïa u sying ha kane ka jylla Meghalaya ka long kumba 60,000 metric tonne ha ka shi snem.
Lyngba kane ka mishon, ka Department of Agriculture and Farmer’s Welfare kan sa sam ïa u symbai sying kum u IISR Mahima, IISR Varada bad Nadia (ïa uba la rep bha ha ka jylla baroh kawei).
Katkum kane ka mishon, kumba 50,000 ngut ki nongrep kin sa ïoh jingmyntoi bad ïa ka jingthung ïa u sying yn sa pynheh na ka 10,000 hectare sha ka 12,500 hectare.
Nalor kaba sam ïa u symbai sying, lyngba kane ka mishon yn sa ai jinghikai pyntbit ïa ki nongrep lyngba ka Package of Practices (POP) bad shaphang ka rukom rep kaba thymmai bad kumjuh ruh kumno ban pynïaid iew ïa une u mar rep.
Haba kren ha kane ka sngi, u Myntri Rangbah u la ong ba yn sa nang pynkham janai shuh shuh ïa ka mishon rep sying khnang ban kyntiew ïa ka ïoh ka kot jong ki nongrep ha kane ka jylla.
U la ong ba u Sying Makhir ïa uba la ju niew ba u dei ruh u dawai kynbat yn sa kham pynleit jingmut kumno ban nang pynroi shuh shuh ban thung ïa une u jingthung.
U la ïathuh ba T. 121 klur la dep mang pisa na ka bynta kane ka mishon tang ka bynta lai snem bad ha kaba kut jong kane ka mishon, ka Jylla Meghalaya kan sa long ka jylla kaba lai ha kaba jur eh ka jingpynmih ïa u sying ha ka ri.
Kum ban shu kdew, ka Sorkar kan pynlut pisa haduh T.18 klur ha ka snem banyngkong ban pynmih haduh 2,200 metric tonne ha kaba yn sa sam ei ïa ki symbai sha ki 9000 ki nongrep mynta u snem ha ki 400 tylli ki shnong. Kumba 6 klur yn sa pynlut ha ka Package of Practices, ka jingai jinghikai ïa ki nongrep bad kiwei kiwei. Yn sa buh ruh 30 tylli ki Processing Units ba thymmai ha kylleng ka jylla bad yn sa mang pisa T. 7.5 klur. Kumba T. 1 klur yn sa pynlut ha kaba pynïaid iew ïa u sying, ban pynkha ïa ka jaka song ïa u sying khnang ban die pat sha ki paidbah bad kiwei kiwei.
Ha kane ka sngi, la sam ruh ïa ki symbai sying sha ki nongrep.