Ha ka ktang suloi ki BSF duhei u Bah Roning ïa la ka jingim, shah kynnoh ba dei u nongkhaïi tuh
2 ngut ki khun bad ka kurim u la iehnoh shadien
![](https://mawphor.com/wp-content/uploads/2023/05/siat-iap-bsf-1.jpeg)
Pynursla, Jymmang 06: Ka jingjia ba pynpar ‘ñiangkhriat ha ka miet sngi Thohdieng ha kaba uwei u samla rangbah ïa uba la tip kyrteng kum u Bah Roning Nongkynrih 34 snem ka rta uba shong ba sah ha Jalynteng, Nongkynrih u la duh ei ïa la ka jingim hadien ba ki shipai Border Security Force (BSF) ki la siat da ki suloi ïa ka kali kaba u ñiah bad ïa uba la leit dei a ka ryndang jong u.
Kane ka jingshah siat ïap jong u Bah Roning ka la jia harum jong ka shong Mawshun bad ha neng ka shnong Pomshutia ki shnong ba don harum Pynursla.
Kat kum ka jingïathuh u handymen jong kane ka trok u Bah Ribarskhem Nongkynrih uba long ruh u para arkmie jong u Bah Roning uba don lang ha kane ka trok u la ïathuh ba kane ka jingjia ka jia ha ka por 11 baje eiei jong ka miet sngi Thohdieng.
Haba u Mawphor u la hiar ban sakhi ïa kane ka jingjia la ïohi ba kane ka trok kaba la ñiah da u Bah Roning la ïohi ba ki don lai tylli ki dak rung kuli ha ka ïit jong kane ka kali.
Na ka liang ki BSF ki la kam ba kane ka kali kaba la ñiah da u Bah Roning kam shym la sahngeh satia wat hadien ba na ka liang jong ki ki la pynïeng ha ka jaka kaba ki ïeng ban talasai ïa ki trok kit mar khaïi duh ban shalan sha ka ri Bangladesh.
“Ngi kit ïa ka mar (ki muid) jong ka malik ban pynhap ha ka sem Mawshun ym ba ngi mut ban pynhiar sha Bangladesh , hynrei ynda poi ha kane ka jaka ha ka lad ban leit sha ka sem masi ngi kynduh ïa ka trok shipai kaba wan na ki thaiñ Dawki bad ngi ruh ngi ai lad ba kan ïaid bad leit sha ka surok khyndew hynrei ha kata ka khyllipmat hi ba la shu ïohsngew ïa ka jingbthei kynsan ki ktang suloi bad markumta hi nga ïohi ïa u hymmen ba la lyngkien ka snam,” ong u Bah Ribarskhem haba kren bad u Mawphor.
U la ïathuh ruh ba hadien kane ka jingjia tang hadien katto katne minit hi ki pulit ki la wan poi ha kane ka jaka ‘hynrei ki shu peit tang na jngai khlem pyrshang satia ban ïarap ïa u hymmen jong nga hana ba hap ap ïa ki Majistor ba kin wan poi bad naduh kata hi ka por ki pulit ka Pynursla ki la pynbna ïap ïa u hymmen,’ u la ong.
“Nga lyngngoh ba kumno ki lah ban pynbna ba u la ïap haba ki khlem ktah eiei bad hato ki dei pynban ki doktor ne,” u la buh jingkylli.
Da ka jingkhlad noh jong u Bah Roning u la ieh shadien ïa ka kurim jong u bad ïa arngut ki khun ba iwei ba 4 snem eiei bad iwei pat ba dang lai bnai.
“U dei u khunswet naduh ba u dang rit bad nga lah ban ong ba u dei ruh u briew uba trei shitom,” ong u Kñi jong u ha ka jingïakren bad u Mawphor.
Na ka liang ki pulit ka Pynursla Police Station ki la pynkit noh sha Civil Hospital ha ka por 10:30 eiei na bynta ka post mortem.
Kat kum ka jingïathuh kiba ha ïing ki la pynpaw ba ki kwah ban pyndep noh ïa ka niam onthang ha ka sngi u Blei, ‘hynrei namar ba ki dang don ki kyndon ngi hap ap ban ïoh jingbthah na ki pulit,’ pynpaw u kñi u Bah Roning.