Ka jingtohkit ka la ïaid, nga la bthah ïa u SP ban pynstet: Bah Prestone

Shillong, Jymmang, 06: U Symbud Myntri Rangbah ka Jylla u Bah Prestone Tynsong ha ka sngi Saitjaiñ u la ïathuh ba ka jingtohkit halor ka jingshah siat ïap jong u Bah Roning Nongkynrih ha ki shipai Border Security Force ha surokbah hapdeng ka shnong Pomshutia bad Mawshun, Pynursla kaba la jia ha sngi Thohdieng ha ka por kumba 11 baje mynmiet.
“Ka jingtohkit ka la ïaid, ïa ka met jong uba ïap (Bah Roning) la pyndep hynne (ha Shillong Civil Hospital) bad ïa ka met la rah sha iing ha kaba ïa ka met yn sa pyndep lashai (ka sngi U Blei,” la ïathuh u Bah Tynsong uba long ruh u MLA jong ka Pynursla Constituency ha ka jingïakren bad ki lad pathai khubor.
“Nga la bthah ïa u Superintendent of Police ban un leh pynstet kaba lah khnang ba ngin sngewthuh kaei pat ka sienjam ba ngin shim hadien kata,” la bynrap u Bah Prestone.
Shuh shuh u la ïathuh ba u Investigating Officer (IO) jong ka Pynursla Police Station u la leh ïa la ka jong ka kamram. “Ai ba ka aiñ kan ïaid bad ïa kiba leh bakla ngim banse ban leh da kaba tyngeh,” bynrap u Bah Prestone.
Haba kylli, u Bah Prestone u la ong, “ngim tip ba haduh katno kata ka jingjia kan pynlong ïa ki shipai BSF kin siat. Ïa kata ruh ngam pat nud ban ong eiei haduh mynta. Ngin ap shwa ïa ka jingtohkit bad ngin sa lah ban leh eiei.”