Tang ka Civil Suit ka lad ba lah ban kyndang ïa ki Harijan na Them ïewmawlong: VGK Kynta

Shillong, Ïaiong 28: U Bah VGK Kynta uwei na ki nongsaid aiñ ba la rangbah ka jylla u la ong ba na bynta ban pynkynriah ïa ki Harijan kiba sah ha Them Ïewmawlong sha kiwei pat ki jaka ka dei beit tang da kaba ka sorkar kan ujor da ka Civil Suit namar katei ka jaka ka la dei hapoh ka jingpeit jingkhmih jong ka.
Haba kren bad u Mawphor u Bah Kynta u la ong ba lada ka sorkar ka ujor da ka Civil suit ka dei na bynta ka jingkyndang ïa kiba sah ha katei ka jaka ka dei da ka Civil Suit for Eviction namar ka dei ka jaka jong ka ym shuh ban ujor na bynta ban ïoh kam trai ïa katei ka jaka.
“Ka bor longtrai ïa kane ka jaka kumba ka paw mynta ka la don ha ka kti ka sorkar bad dei ma ka ban ujor ïa kane ka mokotduma ha ka Civil Court namar lada ngi peit ïa ka mokotduma kaba ki la ujor ba la shim bishar bad pynmih ïa ka hukum ha u 2019 na ka liang u nongbishar u la dep ban ong ba namar kane ka kam kat kum ka jingkhmih jong u ka dei tang ka Civil Court kaba lah ban ai rai,” ong u Bah Kynta.
U la ong ruh ba lah ban pynskhem ba katei ka jaka kam dei jong ki Harijan ka dei namar dang tang ha ki khyndiat snem kiba la leit na ka liang ki Harijan kiba sah ha katei ka jaka ki pan Pata na u Syiem Mylliem na bynta ba kin tei ïa ki Gurduwa ha katei ka jaka.
“Ka jingpan pata ka dei beit ban ai wai jaka namar ka pata kam dei ka dulir long trai hynrei ka jingpynskhem ba la ai wai katto katne snem bad kane ka la shai kdar ba kim dei satia ma ki ba long trai hynrei ïa ka Hima Mylliem bad namar ka la don ka jingpynbeit ha kine ki khyndiat snem hapdeng ka Hima Mylliem bad ka sorkar jylla bad ka don ruh ka jingsiewdor ka sorkar sha ka Hima ba kumba long mynta kane ka jaka ka la dei bad ka sorkar,” u la bynrap.
Haba kylli halor ki sienjam kiba ka sorkar ka shim na bynta ban weng ïa kiba sah ha katei ka jaka la ki dei ki lynti kiba dei ne kiba bakla u Bah Kynta u la ong, “Lada ngi peit na kato ka hukum ha u 2019 ka la shai kdar ba ka dei beit tang da ka Civil Suit ka lynti kaba suk tam hynrei kane ka sienjam kaba ym tang kane ka sorkar hynrei naduh ki snem ba kham mynshuwa ki shim ka dei ka lynti kaba kyllaiñ kaba shu pynsyrwa kai ïa ka pisa u paidbah bad ruh ïa ka por,” u la ong.
“La da ki bun lak ka la don ka jingpynlut pisa ha kaba ïadei bad kane ka kam namar ka la poi ruh sha Supreme Court nangtasa sha High Court biang,” u la bynrap
Haba kylli lada ka sorkar kan ujor da ka Civil Suit haduh katno kan shimpor ban ïoh ïa ka rai bishar, “Kane kan ym shimpor slem namar ba mynta ki kyndon ka CPC bad CrPC ki la treikam pura ha ka jylla la kumno kumno tang hapor 6 bnai la lah ban ai rai namar ïa kino kino ki suit lah ban pan por ne adjournment tang laisien naduh kaba sdang ban file haduh ban da poi sha ka sngi ba kin pynmih ïa ka hukum,” u la ong.
U la ong ba lada ka sorkar ka shem ba kane ka lynti ka long kaba jwat bad kaba kyllaiñ than ka lah ban shim sa da ka lynti kaba ar kata ba kan shim beit ïa kane ka jaka sha lade na bynta ban ban pyndonkam ban ïoh myntoi u paidbah ne for public purpose da kaba kan pynshong dor ïa ki jingtei kiba don ha katei ka jaka ban siew dor pat ïa ki trai jingtei kat kum ba ki shong dor bad ba ïa ka khyndew pat dei ban siew sha ka Hima Mylliem.
“Nga ïohi ba ka mih ha ki katto katne ki lad pathai khubor ba ka sorkar ka lah ban ujor da ka Civil Suit bad lada ka shim shisha ïa kane ka sienjam nga lah ban ong ba ka jingïaid lynti ka la dei ha ka liang kaba dei,” u la kynthoh.
U la ong ruh ba naduh kaba sdang ba ka sorkar ka khot ïakren ha jaka ban ujor da ka suit ka la dei ka jingaijem than ïa ki haduh ba i kumba ki la shim kabu pynban ïa ka jingjem ka sorkar.
“Ka shait ong ka ktien ba phi ai shiinshi ka khyndew kin kam ei syndon shimer bad ka jingkhot ïakren ïa ki Harijan ruh nga ïohi ka poi shata,” u la bynrap.