6 tylli ki pata kyiad be-aiñ ki nong Tibet khang tala ka HNYF

Shillong, Ïaiong 24: Hadien ka jingkhynra Trading License da ka tant Enforecemt ka Khasi Hills Autonomous District Council (KHADC) ha Iewduh bad ki bynta ka them Iew Mawlong kaba la pynlong ha ka 24 tari Ïaiong, na ka liang ka Hynñiewtrep National Youth Front (HNYF) East Khasi Hills ha ka sngi Nyngkong ka la pynlong ïa ka jingkhynra license pata kyiad ne Bar Licesne ha ki bynta ka Iewduh bad ha kane ka jingkhynra la lap ba haduh 6 tylli ki pata kyiad ba la longtrai da ki jaid bynriew Tibet ba la shu die be-aiñ khlem ki kot ki sla.
Ha ka jingkhynra ka HNYF la sakhi ba kiba kine ki pata kyiad kim don satia ïa ki License pata Kyiad hynrei la lap ba kiba bun la shu die be-aiñ da kaba pyndonkam tang da ka License Dukan ba ne Resturant License.
Haba ki nongïalam ka HNYF ki la kylli ïa kine ki trai dukan la ka ju don ne em ka jingwan khynra da ka tnat Excise jong ka sorkar jylla uwei na ki trai dukan u la ong, “ka ju don teng kham mynshuwa ka jingkhynra hynrei lada ngi shah khynra ki ju shim ïa ka mar (kyiad) bad tang shu siew pisa ki la pyllait noh bad ai jingbit biang da ka ktien ban leit plie biang ïa ki dukan jong ngi.”
Haba kren sha ki lad pathai khubor u Assistance General Secretary ka seng Bah Tyllibor Swer u la buh jingkylli ïa ka tnat Excise jong ka sorkar jylla bad kumjuh ïa ka District council kaba la ai lad ba kine ki kam be-aiñ kin trei sahuh khlem ki kot ki sla kiba biang.
“Kane ka jingïohlad ban plie be-aiñ ka pyni ba ka don imat ka jingïa sngewthuh jingmut kaba ha lyndet hapdeng ka tnat Excise ka sorkar jylla, ka District Council bad wat bad ki bor ka Hima Mylliem ruh bad kine ki trai dukan pynïaid be-aiñ,” u la ong.
“Kumno ha kane ka jingkhynra Trading License kaba dang shen kaba wat u CEM ka KHADC u synran lang la khynra beit thik tang ïa ki dukan shana katba ïa ki pata kyiad be-aiñ kam don kano kano ka jingshim khia,” u la buh jingkylli.