Jop ki 3 ngut shipara ha ka ‘Mawkyrwat District Level Cycle Race 2022’ ba la pynlong da ka MDCA

Mawkyrwat, Ïaïong 24: Ka Mawkyrwat District Cycling Association (MDCA) mynta ka sngi ka 23 tarik u Ïaïong, 2022 ka la ïoh ban pynlong ïa ka jingïakop ñiah ar shaka (cycle) kaba la tip kum ka Mawkyrwat District Level Cycle Race (MDLCR) 2022 kaba la pynlong ha madan St. Micheal LP School, Jakrem (Pyndenspar) ha kaba ki lai ngut shipara ki la ïoh rah ïa ka nam jingjop ha kane ka jingïakhun.
Ka jingthmu jong kane ka long ban pynshlur na ka bynta ki khynnah bad ki khun samla jong ka dong ka thaiñ ba kin long borabor ki ban ïai pynkhlaiñ ïa ka met ka phad lyngba ka jingñiah ïa ki ar shaka (cycle). Lyngba kane ka jingailad ban mih shakhmat ban ïa shimbynta kan long ruh kawei na ki bynta ban pynlong ïa ki briew ba kin lait na kiei kiei ki jingsniew kiba har rukom kiba la sdang ban jyllei ha kine ki sngi kum u drok bad kan long ha kajuh ka por ban don ka jingïa ithuh ithaw para briew.
U bah Staline H. Diengdoh, MCS, SDO ba la shongthiat jong ka Ranikor Civil Sub Division ha ka jingkren jong u kum u kongsan u la pynpaw ka jingai khublei na ka bynta ka Mawkyrwat District Cycling Association (MDCA) kaba la pynlong ïa kum kane ka jingïakop ha kaba ka dei ruh ha ka sien kaba nyngkong.
U la ong ba ai ba kane ka jingñiah cycle jong ki kam dei ban long tang ban ñiah kai ne ñiah sngewbha hynrei ki dei ban don la ka jingthmu namar ha kane ka jingïakop ki la don ruh katto katne ki samla kiba la ïoh lad ban leit ïashimbynta ha ka State Level bad ym tang ka jingleit ïa shimbynta hynrei ki la rah ruh ïa ka nam jingjop.
Namarkata, u la pynpaw ka jingaikhublei na ka bynta baroh ki nongïashimbynta ba ki dei ban ïashimbynta da ka mynsiem ne sporting spirit khnang ba ka jingthmu jong ki kan long kaba jop ha ki liang baroh. U la ai ruh ka jingkyrkhu kyrdoh na ka bynta ka association baroh kawei ba kan nanglah ban pyntyllun ïa ki kam nangne shakhmat ban pynlong biang ïa kum kine ki jait jingïakop khnang ba ki khun khynnah bad ki samla kin lait na kiei kiei ki kam sniew.
U President jong ka Mawkyrwat District Cycling Association (MDCA), u bah Ambrose Thongni u la ïathuh ba ka jingpynbeit ïa kane ka Mawkyrwat District Level Cycle Race 2022 ka long kumno ban kyntiew na ka bynta ka ki khynnah bad ki samla kiba dei ki nongñiah cycle hapoh jong ka South West Khasi Hills District, namar ha kine ki sngi kiba la leit ka South West Khasi Hills District ka la sdang ban paw kyrteng jong ki nongïashimbynta da kaba ki la wanrah ruh ïa ka burom da kaba ki la khur ïa ka nam jingjop ha ka jingïakop ha ka State Level.
Kane ka pynpaw ïa ka jingsngewsarong ïa la ka dong ka thaiñ lajong ba mynta ki la don kiba la leit ïa shimbynta ha kylleng ki jaka jong ka jylla Meghalaya ruh. Namarkata, u don ka jingkyrmen ba lyngba ka jingpaw kyrteng jong ka Balasiewdor Wahlang ha ka jingïakop ñiah cycle ha Nongbah Shillong kan sa long ka nuksa kaba na ka bynta kiwei de ki para samla na kane ka distrik ba kin don ïa kata ka mynsiem jong ka jingïakhun bad ki dei ruh ban buh, “Lada kiwei ki lah, balei nga ngam lah ban poi sha kata ka thong”.
Ha kajuh ka por u la ong ruh ba ka jingwan ïashimbynta jong ki khynnah rit bad ki samla ha kane ka Mawkyrwat District Level Cycle Race 2022, ka la ai mynsiem shibun ïa ka MDCA ba kan sa nang lah ban pynlong shuh shuh ïa kiwei de ki jaid jingïakop khnang ba kan long ka jingmyntoi na ka bynta jong ki da kaba kin don ïa ka mynsiem jong ka jingtrei shitom khnang ba kin kynjoh ha ka thong.
Ka jingñiah cycle kam dei eh tang na ka daw jong ka jingdon ki jingïathong hynrei ka dei kawei ka bynta kaba kordor tam kaba kin ïoh kilanmet, pynsmat pynsting, pynkhlaiñ ruh ïa ka met ka phad bad lait ruh na shibun ki jingpang bad ka ïarap ruh ban nym shah jop ha ki jingmlien ba sniew khamtam ïa ki samla kiba la sdang ban ngop ha ki jingdih ba pynbuaid kum u drok bad kiwei kiwei de.
U don ruh ka jingkyrmen ba lyngba da ka jingshimkhia jong ki ban don ka thong ban ïoh ïa ka nam jingjop ha baroh ki jingmlien ïa ki kam sniew kan wanrah ka jingkylla ha ka jingim jong ki, u la ong. Ban kyntiew shuh shuh ïa kane ka jingïa ñiah cycle, na ka liang ka Mawkyrwat District Cycling Association, kan sa pynlong shuh shuh nangne shakhmat ïa kum kine ki jait jingïakop khnang ba kan long shisha ka jingmyntoi ïa ki samla bad ïa ka dong ka thaiñ napoh jong ka South West Khasi Hills District ba kin ïoh ban ïa shimbynta naduh ka District Level, State Level bad haduh ki International Level.
Ki nongjop ha ka jingñiah ïa ki cycle ba don gear kaba jngai 16 kilometer ki long u Gilbert Wahlang (41.58 minit), u Maitshaphrang Kharwanniang (41.58 minit) bad u Alvindarson Wanniang (43.07 minit), ki cycle bym don gear pat u Willborn Wahlang (40 minit), u Overlyne Kharwanniang (40.59 minit) bad u Shanlng Nongsiej (43.48 minit).
Nangta, ki nongjop ha ka kyrdan sub junior ki long u Kerry Wahlang, u Kevin Lyngdoh bad u Sharai Jyrwa katba jong ki kynthei pat ka Balasiewdor Wahlang, ka Darihun Sohshang bad ka Daphibansiewdor Lyngkhoi.
Ha kane ka sngi la ïadonlang ruh naduh ki nongkitkam jong ka Mawkyrwat District Cycling Association (MDCA), bad ka kynthup ïa ki kmie ki kpa jong ki nongwan ïashimbynta ha kane ka jingïakop.