Mawkyrwat, Ïaïong, 18: Ka Khasi Students’ Union jong ka Rangthong Unit, KSU Rangjadong bad KSU Kynsimphlang Unit mynta ka sngi ka 18 tarik u Ïaiong, 2023 ka la leit jngoh ïa kawei ka longïing jong ka kong Kastina Turnia kaba na ka Shnong Mawlar, South West Khasi Hills District.
Kum ban shu kdew kane ka longïing ka la mad ïa ka jingeh bad ka jingkyrduh hadien ba u kpa jong katei ka ïing u la khlad noh la kumba lai bnai tam ei ei mynta bad u la ieh noh shadien ïa ki phra ngut ki khun bad kawei kaba dang lai bnai tam mynta. “Ka kmie ka hap ban bsa ban sumar ïa ki phra ngut ki khun kiba dang ia rit suda”, ong ka kyrwoh na ka seng.
La ong ruh ba katkum ka jingïathuh ka kmie teng teng ki hap ban shu thiah khlem bam namar bym don khaw shuh bad naduh ba khlad u kpa ym don ba wan ïarap ïa ka. Ha kaba ïa dei bad ki lad jingïarap na ki bor sorkar la ong ba kane ka longkmie ka la dep applai ïa ka skhim ïap lok.
Kumta hadien ba ka Seng ka la ïoh jingtip mar mar ka la leit ba ai jingïarap ïa kane ka longïing da ki lad jingïarap kiba kum ka seng ka la dep ban pynkhreh. Ha kajuh ka por ka Seng ka la kyntu jur ïa ki bor Sorkar ba kin ai ka jingïarap ka ba kham kloi ïa kane ka longïing khnang ba kane ka longïing kan nym don hapdeng ki jingeh hadien habud.
Ïa ka kynhun ban leit ai jngoh ryngkat ka jingleit ai jingïarap la lamkhmat da u samla Saiñdur Syiemlieh, President KSU Rangthong Unit, ryngkat ka jingsynran lang u samla Tariastar Thongni, President KSU Rangjadong Unit, u samla Dmingland K. Dewsaw, General Secretary KSU Kynsimphlang Unit bad kiwei kiwei ki dkhot ryngkat ka jingïadonlang u bah Plosbor Kharjahrin, Secretary Environment & Cultural Cell KSU South West Khasi Hills District.
