Ha u Jymmang yn bteng ka jingïapynbeit pud ha ka wat ba ar hapdeng ka Megh-Assam

Shillong, Iaiong 17 : Ka Sorkar Meghalaya bad Assam ki lah ban bteng biang noh ïa ka jingïakren pynbeit pud ha ka wat kaba ar ha u bnai Jymmang bad ha kane ka kynti ka jingïakren kan long na ka bynta ban ïa pynbeit noh ïa ka jingïakajia ha ki hynriew tylli ki jaka .
Haba pyntip ïa kane mynta ka Sngi, u Myntri Rangbah ka Jylla u Conrad K Sangma ula ong “ Ha u bnai Jymmang, ngin pyrshang ban pynlong ïa ka jingïalang ba nyngkong lane ban bteng ïa ka kylla ba bud jong ka jingïakren pynbeit pud. Ai ba ka por kan wan, Nga khmih lynti ba lehse ha u bnai Jymmang, ngin lah ban ïohi ïa ka kylla ba –ar jong ka jingïakren pud”.
Ha ka 24 tarik Lber, ka Sorkar Jylla kala thaw ia lai tylli ki Regional Committee ki ban shong bishar ïa ka jinglong jingman ba mynta jong ki hynriew tylli ki jaka bym pat pynbeit satia ïa ka jingïakajia bad ban aiti ïa ka kaiphod hapoh ka 45 sngi.
Kine ki hynriew tylli ki jaka ki kynthup ïa ka Langpih ha West Khasi Hills District, Borduar, Nongwah-Mawtamur, Deshdoomreah, Block-II kiba hap ha Ri-Bhoi bad ka Block-I, Psiar-Khanduli kiba hap ha West Jaintia Hills District.
Ki arngut ki Symbud Myntri Rangbah-bah Prestone Tynsong bad bah Sniawbhalang Dhar kin khlieh ïa ka Regional Committee ka Ri-Bhoi bad West Jaintia Hills District katba u Myntri Sorkar bah Paul Lyngdoh un long u Chairman jong ka Regional Committee ka West Khasi Hills District.