Hato ki kynthei kim don eiei mo ban kren halor ka eh ka shon ha ka imlang sahlang
Patricia Mukhim
![](https://mawphor.com/wp-content/uploads/2022/07/Article.jpg)
Ha kane ka jylla Meghalaya ïa kaba la tip kum ka matrilineal society lane ka jaitbynriew ha kaba ki khun ki shim jait na ka kmie, ha man ba pynlong kino kino ki jingïalang paidbah (lait noh kito kiba pynlong da ki seng kynthei), ym ju kham ïohi bad ïohsngew ba ki kynthei kin kren bad pynsngew paidbah ïa kaei kaei kaba ki don ha ka jingmut jingpyrkhat jong ki. Tip balei ba ki kynthei kim shlan ban kren ïa kaei kaba ki sngew. Lehse ka jingkren ki riew hyndai ba, “ynda lah kynih ka ‘iar kynthei ka pyrthei ruh ka la jan wai.” Kane ka jingkren pharshi ka thew sha kiba bun ki bynta kiba dei ban ïatai bha. Kane kam dei shuh ka juk hyndai ha kaba ïa ki kynthei bad longkmie la shu rai beit ba ki dei ban don ha ïing shet ja bad ban pynbiang ka bam ka dih na ka bynta ka ïing ka sem baroh kawei, nalor ka khlieng ka sait; ka saitjaiñ sait nep bad ka sumar khun. Ka kam u rangbah la rai beit ba ka dei ka kam ban kamai na ka bynta ban pynbit pynbiang ïa ki jingdonkam ha ïing ka sem.
Mynta ngi don ha ka spah snem kaba arphew wei (21st century) ha kaba ki kynthei ki ïakot ka bor pyrkhat bad u rangbah; ki trei ïa ki kam engineer, doktor, ki nos, ki nonghikai skul bad kolej; ki ophisar ha ki ophis sorkar bad ha ki kompeni bapher bapher. Ki kynthei ki ïashim bynta ruh ha ka kam saiñ pyrthei bad ki long ruh ki myntri sorkar. Namarkata ki kynthei ha kane ka juk ki don la ka jong ka bor bad ka iktiar. Hynrei haba phai sha ki seng bapher bapher kum ka seng ki samla pule ne kiwei pat ki seng trei mon sngewbha ym ju kham ïohsngew ba ki kynthei kin long ki nongkitkam kum ki President ne ki Secretary. Hato ki kynthei kim long kiba bit ne kiba tbit ban long nongïalam ïa kiwei pat ki seng khleh lait noh tang ïa ki seng kynthei? Mano ba bsuh ïa kum kine ki jingsngew ha ngi?
Bunsien haba don ki jingkhot khamtam lei lei kiba dei na ka liang sorkar la ju ïohi ba ka dap ka kamra tang da ki rangbah suda. Ha ka 14 tarik mynta u bnai ka don ka jingkhot na ka liang ka sorkar ban ïatai kumno ban ïaleh ban pynkhuid pynsuba noh ïa ki wah bad ki wahduid jongngi ha sor Shillong – kata ïa ka Wah Umkhrah, Umshyrpi bad Umkhen. Ha ki por kiba mynshuwa wat tang kumba arphew snem mynshuwa ruh kine ki wah ki dang khuid dang suba. Mynta pat ki la kylla long jaka theh niut. Don ki ïing kiba pyntuid paiñkhana bad nala beit beit sha ka wah Umkhrah bad Umshyrpi. Ban pyrshang ban pynkhuid ïa kine ki wah baroh ka dei ka kam bah kam san ha kaba ki shnong kin donkam ïa ka jingïatrei lang khamtam bad ki kynthei bad ki longkmie. Hynrei ha katei ka jingïalang kaba 14 tarik ym shym don ki kynthei ki ban kren ei ei. I kumba ki kynthei ki riej ne ki lehraiñ ban kren ha ki jingïalang kiba don bun ki rangbah.
Ki kynthei kiba kham pynlut por ha ïing shet ja, ki kham pynmih ruh ïa u ñiut bajhieh (wet waste) kum ki snep soh, snep jhur, ka ja ka jingtah kaba lah bret noh bad kumta ter ter. Lada ki kitkhia ban tih ïa kawei ka thliew ha la kyrpong ïing bad tep ïa kine ki kynja niut, kin sa ïoh ïa ka sboh hadien katto katne bnai. Hynrei mynta ngi shem ba ïa ka jaboh jabaiñ na ïing shet ja ruh lah leit theh beit ha ki kali lum niut.
Balei ba nga ïai ban ba donkam ban pynsngewthuh khamtam ïa ki longkmie bad ki kynthei shaphang ka jingdonkam ban pynkhuid ïa ki wah ka long namar ba haba ngi leit pynkhuid ïa ka Wah Umkaliar kaba ha Nongmynsong ngi ïohi bad lap ïa kiei kiei kiba sngew lehraiñ ban ïathuh ruh. Hynrei ngi hap hi ban ïathuh ïa ka jingshisha. Ha ka wah ngi hap tam ïa ki sanitary napkin lane ki kymphad kiba ki kynthei ki pyndonkam haba poi bnai bad ki bret thurmur sha ka wah bapli. Mynnor la ju pyndonkam da ki jaiñ bad la sait noh ïa ki haba la dep pyndonkam. Ha kane ka juk wad jingsuk pat shu pyndponkam shu bret thurmur. Nalor kata ngi ïoh tam ruh ïa kita ki ‘Huggies’ lane ki kynja napkin khunlung kaba don bad ka jaboh (painkhana). Hato balei mo ngi la kylla long kiba lehbeiñ ïa ka mariang jongngi haduh katne? Ka mariang ha kawei ka sngi kan sa ïaleh pyrshah ïangi ki khun bynriew lada ngim ïa peitmat noh kloi.
Ki rangbah haba ki kren kim da tip eh kaei kaba jia ïa ki wah ki um jongngi. Hynrei dei ki kynthei ki longkmie kiba leit sait jaiñ sha wah. Dang bun bah ki longïing ki bym pat don um ha ïing. Kine ki longïing baroh ki poi sha wah ban sait jaiñ. Sngewsih ban ong ba kine ki nongsait jaiñ kim sngewpher wat la ka um ka ïong, ka jakhlia bad ka lati namar ba sait kali kham shaneng kumba long ha Umkaliar. Kine ki nongsait jaiñ kim ju ïashim bynta satia ha ka ban ïa pynkhuid lem ïa ki wah. Haba leit pynkhuid wah ka kynhun jongngi ki shu peit narud na kiar hynrei kim treh satia ban ïashim bynta lang ha kane ka jingpyrshang ban pynkhuid ïa ka wah.
Ka por ka la poi ba lada ngi ki longkmie ngi sngew sarong ban ong ba ngi long kita ki nongrim bakhlaiñ jong ka imlang sahlang te ngi dei ruh ban shim ïa ka jingkitkhlieh bad pynkhuid lem ïa ka mei mariang kaba kynthup ïa ki wah bad ki lynti ki syngkien. Lehse lada pynkup bor ïa ki longkmie ha man la ki dong ba kin long ki nongpeit pyrman ïoh don ba bret ñiut thurmur bad ban kem ïa kum kita khnang ba kin hap siew da ka phaiñ kan bha shibun eh.
Ki kynthei bad longkmie kim dei shuh ban long tang ki nongsngap kiba shu wan jingïalang hynrei ki bym khlem kren ei ei ruh. Ki dei ban pyndonkam ïa la ka iktiar ban peit ba kiwei ki para kynthei kin ïashim bynta ha ka ban peitngor ïoh don ki riew shim kabu kiba bret ñiut ha ki wah ha ka jaka ban leit bret ha ki trok kit ñiut. Lada kawei pa kawei ka longkmie ka phikir bad sdang na la ïing ban ym bret pathar ïa u ñiut, nga ngeit ba kane ka sor Shillong bad ki wah jong ka kin khie-im biang sa shisien.
Nga kyntu ruh ïa ki para longkmie bad ki kynthei ba phin ïa long kiba shimti kam ha shnong ha thaw. Ngi dei ban ïatrei ryngkat ryngkat bad ki rangbah namar ma mangi ngim dei shuh kita kiba tang shibor.