Shillong, Iaiong 16 : Uwei u pulit langrut uba kyrteng u Vicky Biswa u la shah kem halor ka jingkynnoh ba u pyndonkam bakla ïa ka pisa ba la mang ban thied ïa ki tiar ban ïada na ka khlam Covid-19.
Ka khubor pulit ka ïathuh ba u dei uba ju trei bad u AIG (A) u G.K Iangrai. ïa une u pulit la kem ha ka Sngi Palei. Ka ïing bishar ka la ailad ïa ki pulit ban set ïa u lai sngi ha byndi jongki khnang ba kin ïoh ban tohkit bniah ïa u.
Ki tiar ba la mang ban thied ban ïada na ka khlam Covid ki kynthup ïa ki sanitiser, ki pp kits, mask bad kiwei kiwei na ka bynta ki pulit.La kynnoh ba ki don ki tiar kiba khlem thied hynrei la shu shna bill bad ki don kiba la thied bad pynheh ïa ka bill. La kynnoh ruh ba ka rukom sam ïa kine ki tar ïada na kane ka khlam sha ki pulit hapoh katei ka jaka ba u don kam long ryntih bad sa kiwei ki tiar ba ïoh jingïarap na ki seng bapher bapher ruh la shu sam katba mon.
