Shillong, ïaïong, 16: Shi sngi hadien ba ka kynhun State Disaster Response Force (SDRF) bad ki Volunterr shnong ki la ïoh sei na riat Rngaiñ ïa ka met jong u Bah Seiborlang Jaktung, uba long ruh u Rangbah Shnong jong ka Wahlyngkhat ha ka janmiet sngi Saitjaiñ, ha ka sngi u Blei la ïoh sei sa ïa ka met jong u Bah Krejon Khongjirem.
Katkum ka jingïathuh jong ka Sub-Divisional Officer (SDO) ka Pynursla Civil Sub-division ka Kong EL Warjri ïa ka met jong u Bah Krejon Khongjirem la ïoh sei shwa ka por 8:00 baje mynstep bad hadien kane la aiti noh pat sha ki bahaing hasem hadien ba la pyndep ïa ka jingleh post-mortem ha Shillong Civil Hospital.
Kine ki arngut ki rangbah ki la shah rong sha riat Rngaiñ ryngkat bad ka kali Datsun Ready Go kaba don ïa u nombar ML05T7892 ka jingtwa jong ka khyndew bad ki maw ha surok Shillong-Dawki ynda poi ha riat Rngaiñ katba ki dang thmu ban phai sha la ing hadien ba la wan phai na ka shnong Mawsynram. Kane ka la jia ha ka janmiet sngi Thohdieng ha ka por kumba 7:30 baje janmiet.
Ha kane ka jingjia, kawei ka kali Mahindra Max Tourist kaba don ïa u nombar ML06 A 3026 kaba kit ïa ki khyndai ngut ki nongleit jingleit ka la julor na kane ka jingtwa khyndew. Ïa ki khyndai ngut kiba la mynsaw la pynkit noh da ki Pulit sha Pynursla CHC ban ïoh ïa ka jingsumar.
Ka jingshna pynheh ïa kane ka surok Shillong-Dawki ka dei kaba la pyntrei da kawei ka kompeni ARSS. Haduh mynta ka kompeni kam pat lah satia ban pynkhuid ïa ka khyndew kaba la hab hapdeng surok. Da ki phew spah tylli ki kali kiba wan naneng bad narum ki la sahkut hapdeng surok haduh mynta.
U Symbud Myntri Rangbah ka Jylla u Bah Prestone Tynsong uba long ruh u MLA jong ka Pynursla Constituency ha ka sngi Saitjaiñ u la hiar jurip ïa kane ka jingtwa jong ki maw bad ka khyndew ha riat Rngaiñ bad u la bthah ruh ïa ki ophisar jong ka National Highways & Infrastructure Development Corporation Ltd. (NHIDCL) ba kin phah da ki Expert na Indian Institute of Technology (IIT)Guwahati ban pynlong ïa ka jingsorjamin ïa kane ka jaka bad ban bishar bniah ruh ïa ka jinglong jingman jong ka khyndew bad ka jingshong kynrong jong ki maw khnang ban ïada ïa ka leit ka wan jong ki paidbah ka thaiñ Riwar Mihngi shwa ban poi ka lyiur.
Ha kajuh ka por, u Symbud Myntri Rangbah u la bthah ïa ki bor synshar distrik ba kin ujor da ka ejahar khnang ba ka jingtohkit kan lap mano ba leh bakla ha kaba ïadei bad kane ka jingtwa khyndew.
Ïa ka jingshna pynheh ïa ka surok arlaiñ Shillong-Dawki la aiti ka Sorkar ka la aiti ha ka National Highways & Infrastructure Development Corporation Ltd. (NHIDCL) bad kaba la aiwai ïa ka jingtrei sha ka ARSS company.
