Shillong, Iaiong 16 : U MLA ka Mylliem bah Ronnie V Lyngdoh u la ong, ka seng Congress ka don ka jingkyrmen ban jop ïa ka elekshon MLA na Sohiong Constituency namar ki paidbah ki la ïohi ïa ka rukom treikam kane ka sorkar bad ki seng saiñ pyrthei kiba donlang bad kumta ki paidbah kin sa ai ïa ka jubab kaba biang bha.
“Ki paidbah ka Sohiong mynta kila stad bad kin sa ai ïa ka jubab kaba biang bha haka elekshon MLA jong ka Sohiong Constituency, hadien ba ki la sakhi ba ka United Democratic Party (UDP) kala leit ban thaw sorkar lang bad ka seng National Peoples’ Party (NPP)” ong u Bah RV Lyngdoh.
Une u nongïalam jong ka Congress Legislative Party (CLP), ula ong, ha ka por elekshon MLA ka UDP ka la thet kti ha kine ki san snem ba la dep watla ki la donlang ha ka sorkar MDA barim, hynrei ka UDP wat tang shi sngi ruh kam shym la ap hynrei ka la mareh bran bran ban thaw sorkar lang bad ka NPP, kumta u paidbah ka Sohiong un sa ai ïa ka jubab ha ka elekshon kaban long shen.
“Ka Congress ka kyrmen skhem ba ka elekshon ha Sohiong kan pynkiew jingkheiñ ïa ka seng ïa ka jingdon ki MLA ha ka ïing Dorbar thawaiñ ka jylla na ka 5 ngut sha ka 6 ngut,” ong u bah Ronnie.
Ula ong, ka seng Congress ka don ïa ki mat ba kongsan ban wanrah ïa ka synshar khaddar kaba beit, kaba pyrkhat na ka bynta ka jingmyntoi jong ki paidbah ha kaba ka khajna kan ym lait ei na ka pla jong ka sorkar sha kino kino ki riew shimet.
