Ba hiar ka dor synsar, khot u Bah Banteidor ïa ki nongkhaïi na Mawïong ban nym khñiot ïa ki nongrep

0

Shillong, Iaiong 16: U Bah Banteidor Lyngdoh, Myntri barim ka Sorkar Jylla bad uba dei mynta u Adviser sha ka Sorkar Jylla halor ka tnad Agriculture & Farmers Welfare, u la khot ïa nongkhaïi synsar- kiba khaïi lyngba ka Ïew ha Mawïong ban maham ïa ki ba kim dei ban khñiot beiñ ïa ki nongrep synsar.
Kane ka jingkhot u Bah Banteidor ïa kitei ki nongkhaïi ka dei hadien ba ki nongrep synsar na ka thaiñ Rasong bad kiwei pat ki shnong ki la ud sha u ba ka dor synsar ka la nang hiar kat nang mih ki sngi wat hapdeng ba ka Sorkar ka la dep ban ithuh ïa u kum u mar-rep khlaw bad u bym hap ha ka thup shah lum khajna.
U la ong bad watla ki la rai ban pynkiew noh ïa ka dor u synsar hynrei ka shong pat ha ka rukom long ka ïew ka hat namar ki don ki por ba ka ïew ka kiew bad don ki por ba ka ïew ka hiar.
“Nga ïoh ka jingud na ki nongrep synsar kiba la ong ba ka dor hiar bad kumta nga la hap ban khot ïakren bad ki nongkhaïi khnang ban lap ïa ka daw”, u la ong da kaba kdew ba ki nongkhaïi ki la ong ba ka dei na ka daw ka jingbym don bha ka jingdawa na shabar jylla.
U la ong ba ki la pynpaw ruh ba ki don ki kali na Assam kiba wan sha ki jaka khappud ban thied synsar na ki nongrep kum ha thaiñ Jirang bad ki khñiot dor ïa ki nongrep. “Halor kane ngan ïakren bad ka tnad bad ngan phah jingthoh sha ka Council ban teh lakam ïa kum kine ki jingwan kiba khlem long katkum ki kyndon aiñ”, u la ong.
Halor ka jingshah daiñ kuna ki nongrep synsar ha ki jaka khappud ha ki bor pahara khlaw ka Assam, u Bah Banteidor u la ong ba ka District Council kan hap ïakren bad ki bor na Assam bad ma u ruh un rah ïakren ïa kane ka mat bad ka Sorkar.
Shuh shuh u la ong ba ka jingïakren bad ki nongkhaïi ka la long kaba seisoh bad khmih lynti ba kan ym don ka jingkhñiot beiñ ïa ki nongrep.

Leave A Reply

Your email address will not be published.