Sha ki tyndong shkor ka sorkar pynsngew ïaka jingdonkam ban don ka jaka bret ñiut ba pura

Jowai, Ïaïong 22: Ka Jaiñtia Student Union (JSU) sengkmie mynta ka sngi kala pynlong syndon da ka jingïalang paidbah hakhmat ka ophis u Deputy Commissioner ka West Jaiñtia Hills District ha ka jaka ba pynïeng kali ka Seiñ Raij Jowai kaba don ha Iawmusiang.
Ha kane ka jingïalang la wan ban ïashim bynta naduh ki nongïalam ba hakhmat ka seng JSU, kiwei de ki kynhun seng bhalang, ki nongshong shnong na Jowai, lem bad ki nongshong ïew kiba im ja da kaba shong die jingdie hapoh kane ka ïew ba bna nam ka Ri-Lum Jaiñtia.
Ka jingthmu jong kane ka prokram ka long shi bynta ka kyntu jur na ka sorkar ba kan pynshang katba lah ban pynïoh noh ïa ka jaka theh ñiut ba pura kaba long katkum ka juk ba mynta, ha ka juh ka por kan wanrah ruh ïaka khuid ka suba bad ban lait na ki jingpang kiba lah ban mih na ki ñuit ba sahkut.
Ha kane ka jingïalang paidbah la pynïaid da samla Nevercare Passah uba dei Social Secretary ka JSU Central Body, la pynsngew da ki nongkren ha kane ka sngi kiba la kynthoh jur ïa ka rukom treikam jong ka sorkar khamtam ïa ka tnad JMB kaba ym lah satia ban ai ïa ka jingshakri ïa ki paidbah ban wanrah ïa ka khuid ka suba ka shnong ka thaw kiba dang hap hapoh ka jingpeit jong ka JMB.
Ha ka juh ka por kitei ki nongkren ha kane ka sngi kila kynthoh kynjuh ïa ka tnad JHADC kaba peit ïa ka khyndew ka shyiap kam lah ban pynbiet ïa kane ka jingeh na ka bynta ban pynïoh ïa ka jaka kaba biang ban lait na ka jingleit theh pathar ïa ki ñiut.
Uwei na ki riew rangbha uba la ai jingkren ha kane ka sngi ula pynsngew ba kala dei ka por kum ki nongshong shnong ka Ri-Lum Jaiñtia ba kin don ka jingïatylli lang kawei ka jingmut, khnang ban lait na ka jingsngew ïapher jaitbynriew.
Sa kawei na ki nongshong ïew ha Iawmusiang haba ai jingkren kala kynthoh jur ïa ka tnad JMB namar ka jingbym lah jong ka ban pynbeit ïa kane ka kam naduh basdang ka jingwan treikam jong ka hapoh ka sor Jowai, da kaba ong hashwa ban seng ïa ka ophis dei ban pynbiang shwa ïa ka jaka bret ñiut.
Kala ong ka jinglumthup ïa ki ñiut ha ïawmusaing kam dei kaba mih tang na ki nongshong ïew hynrei ki don ruh ki briew na ki dong bapher bapher kila wan ban bret khnang ïa ki ñiut jong ki shapoh kane ka ïew Iawmusiang.
Na ka liang u samla Jersom Shylla u buh ka jingkylli ïa ka sorkar da kaba ong balei ‘ïa ka tamasa Cherry Blossom ka sorkar ka lah ban pynlut da ki bun bun klur tyngka, katba ïa ka jaka bret ñiut ba paka tang na ka bynta ka sor Jowai kam pat lah ban pynïoh haduh mynta’.
Katba u General Secretary ka seng samla Treiborlang Suchen ula kynthoh jur ïa kito ki shnong kiba pyrshah ïa ka jingleit theh ïa ki ñiut na Jowai da kaba u ong ‘ba la tieng ïa ki ñiut kum ïa bih u Uranium’.
Ula kynthoh ruh ka tnad JMB halor ka rukom treikam jong ka naduh ki por mynshwa namar ka rukom bret ñiut jong katei ka tnad ka long kaba leh pathar shaba palat, dak kaba ai nuksa kum ha ha Mynkjai, ula pynnsgew hapoh ka 3819 Sq kilo miter ka jingïar ka Jaiñtia Hills wat tang 100 Acres ym don mo? ka jaka ban pynlong jaka theh ñiut (Sanitary Landfill) na ka bynta ka Ïawmusiang Jowai.
Ula kyntu ïa baroh ki nongshong shnong kymjuh ïa ki seng saiñ hima sima ba kin dei ban pynlong Politic ïa kane ka kam ñiut namar kane ‘ka dei ka ïap ka im jong ki paidbah nongshnong shnong ka Ri-Lum Jaiñtia hi baroh kawei’,
Ka seng kala kren shai lada ka sorkar kam sngap ïa kane ka jingdawa kaba la jia na ka por sha ka por na ka jinglum thup shi jaka ïa ki ñiut, na ka liang ka seng kan pynlong ïa ka jingïalang ryngkat ki nongïalam shnong bad kiwei de ki kynhun sengbhalang na ka bynta ban ïoh leh ïa kane donkam.