Shillong, Ïaïong 22: Ka Meghalaya State Olympic Association (MSOA) kala pynbna ba ka lympung ïalehkai wat ba saw jong ka Meghalaya Games kan sdang naduh ka 2 tarik haduh 6 tarik Jymmang 2022 ha kylleng ki jaka ïalehkai ha Nongbah Shillong
Kane ka lympung ba mynta u snem kan dei ka lympung kaba heh tam ha kaba kin don haduh 2,600 ngut ki nongïalehkai kiban ïashim bynta ha ki 19 tylli ki jait jingïalehkai, haba ïanujor bad ka wat ïalehkai kaba khadduh (2019-20) ha kaba ki don 1,500 ngut kiba la ïashim bynta ha ki 14 tylli ki jait jingïalehkai.
Na ka liang ka Meghalaya State Olympic Association (MSOA) ka ai khublei kyrpang ïa ka sorkar jylla kaba la kyrshan pisa kaba T. 2.23 Klur ban pynlong ïa kane ka lympung Meghalaya Games da kaba kaba dei ka lympung kaban sei ïa ka sap ïalehkai ki samla jong ka jylla.
“Ngi ai khublei ïa ka sorkar Meghalaya kaba la kyrshan ïa kane ka Meghalaya Games kaba dei ka lad ka kabu na bynta ki nongïalehkai ka jylla ba kin ïoh jingmyntoi bad kan ïarap ruh na bynta jong ngi ban sei ïa ki lahduh ha ka lawei ïalehkai national bad wat ha ki international ruh kumjuh,” ong u Bah John F Kharshiing uba dei u Working President jong ka MSOA haba kren sha ki lad pathai khubor ha ka ophis treikam jong ka Association ha ka sngi Thohdieng.
U la ong ruh ba ka sorkar ba mynta kala shim ïa ka rai kaba biang eh ban wanrah pat ïa ka Meghalaya Games naduh u snem 2020 hadien 16 tylli ki snem ba la sdang nyngkong ïa kane ka lympung.
“Ngi la lah ban pynlong biang ïa kane ka lympung hadien ka jingshah pynthut ha ka khlam jingpang Covid-19, kaba la pynthut ïa ki nongïalehkai. Ngi la sakhi ka jingthrang jong baroh ki district ban ïashim bynta ha kane ka lympung bad ka long ruh ka jingkmen hadien ba ka sorkar kala rai ban pynlong ïa ka manla u snem,” ong u Bah John Kharshiing.
Haba phai ha u snem 2020, kaba dei ka sien pynlong kaba laisien, ïa kiba bun ki jingïalehkai la pynlong ha JN Sports Complex. Katba mynta u snem, na ka daw ka jingkynrum kynram na ka jingïaid shaphrang ka jingshna pynbna ïa katei ka stadium, ïa kiba bun ki jingïalehkai yn pynlong ha sport compler jong ka Sports Authority of India kaba don ha North-Eastern Hill University, bad kaban pynkut ruh ïa kane ka lympung ha katei ka jaka.
Na ka liang u bah Bor Diengdoh uba dei u Vice-President ka MSOA u la ïathuh ba ïa ka sngi plie pyrda yn pynlong ha madan First Ground jong ka Shillong Sports Association, Polo ha ka 3 tarik Jymmang bad yn pynlong ruh tang katto katne tylli ki jingïalehkai.
Katba na ka liang u Bah Finely Pariat uba dei u General Secretary u la ïathuh ba kiba bun ki synjuk ïalehkai hapoh ka jylla kila pynlong ïa ki championships, hynrei ka Meghalaya Games kan dei shi bynta ban jied ïa ki nongïalehkai kiban mihkhmat ïa ka jylla sha ki lympung ïalehkai National.
Kiwei kiwei ki jylla ka thaiñ North East, kum ka Assam, Manipur bad Arunachal Pradesh, kila dep ban pynlong ïa kaba kum kane ka lympung kaba la ïarap na bynta ban kyntiew ïa ka sap jong ki nongïalehkai.
