Kyrmen u President ka UDP ban jop na Sohïong constituency
![](https://mawphor.com/wp-content/uploads/2022/12/Metbah.jpg)
Shillong, Ïaïong 03 : U President ka United Democratic Party, Bah Metbah Lyngdoh ha ka sngi Nyngkong u la pynpaw ba u don ka jingkyrmen ba ka party kan jop na Sohong ha kane ka elekshon kaban long ha ka 10tarik mynta u bnai.
“Ngi sngewskhem ba ngin jop na Sohïong namar kat ki jingtip ba ngi ïoh pdiang ka long ba ka jingjop kadei beit ïa u kyrtong jongngi,” ong u Bah Metbah haba kren bad ki lad pathai khubor.
Lah ban pynkynmaw ba ïa ka elekshon ha Sohïong la pynsangeh shwa shipor hadien ba u kyrtong ka UDP, Bah HDR Lyngdoh ba dei ruh u Myntri Kampohiing ba rim ka jylla, u la khlad noh ha ka 20tarik u Rymphang. Ha kane ka elekshon ka UDP ka la pynieng da u pyrsa jong u Bah HDR, u Synshar Kupar Lyngdoh Thabah ban ïakhun pyrshah ïa u Bah Samlin Malngiang jong ka NPP nalor kiwei kiwei ki kyrtong na ki party bapher bapher.
U President haba jubab ïa ka jingkylli u la kubur ruh ba ka vote sngewsynei kan treikam bha ha Sohïong. “Kaei kaba nga shem ka long hadien ba nga kynduh ïa uwei u rangbah uba dei na ka constituency jongnga hynrei uba shongkha ha Sohïong u la ong ba kane ka kynti watla ki don bad kiwei ki party hynrei kin pyntikna ba kin wanphai biang sha ka UDP ban pynpaw
ïa ka jingsngewnguh ïa u Bah HDR Lyngdoh namar ka jingnoh synniang jong u ha ka constituency ha kine ki snem ha ka por ba u dang long kum u MLA ka thain.
Haba kren pat halor ki common minimum programme, u Bah Metbah u la ong ba ïa kine baroh un sa rah bad u Myntri Rangbah hadien ba u la wan phai na shabar nalor ba mynta u dang bunkam ha kiba bun kiwei ki kam.
“Ngin sa pynsngew ïa ki jingsngew jongngi baroh kum ka party hynrei nga tikna pat ba ki mat kaba ngin sa pynsngew yn sa shimkhia namar ha kaba kut hi kadei na ka bynta ka bha ka miat jong ki paidbah,” u la ong.