Jyrwait shkor ka ïingbishar High Court ïa ka Sorkar Jylla bym shym tehlakam ïa ki trok kit palat pud

Shillong, Lber 31 : Ka ïing Bishar High Court jong ka jylla mynta ka Sngi Thohdieng, ka la jyrwait shkor ïa ka Sorkar Jylla halor ka jingbym shym tehlakam ïa ki kali ba kit palat pud wat hadien ba la bthah ïa baroh ki Superintendent of Police (SP) ba kin shim ïa ka sienjam ban leh eiei pyrshah ïa ki trok ba kit palat pud hapoh ka Jylla.
“Ka Jylla kala ong ba ïa ka blueprint la dep ban pynkhreh bad ka jingthied ïa ki kor electronic weigh-pads kan pynlong ïa ka Jylla ban hap pynlut haduh T. 27 lak. Hynrei, haba kheiñ pat ïa ka dor ban shna ïa shi kilometer ka surok, ka jinglong jaka lum ha ka Jylla bad ka jingïoh slap ba jur jan hynriew bnai, kam dei ban don ka jingai daw ha ka ban pynlut pisa ban tehlakam ïa kane ki trok ba kit ba palat pud namar lyngba jongki ki surok ki sniew kloi” ong ka ïing Bishar lyngba ka Division Bench haka hukum haba bishar ïa ka PIL bala mudui da u Tennydard Marak.
Kala bthah ruh ba baroh ki Superintendent of Police jong ki District ki dei ban tip bha ïa kane bad ki dei ban bthah ban tehlakam ïa ki trok ba kit palat pud. Shisien ba ka don ka jingtalasi bad la pynsangeh ïa ki katto katne ki trok bad ym shah ba kin ïaid khlem da pynhap noh ïa ki mar ba kit tam, kiwei ruh ki la ngat lang ha kajuh ka apot”.
Ka ïing Bishar ka ong ba sngewsih, ka sienjam ba la shim da ka sorkar Jylla ban tehlakam ïa ki kali ba kit palat pud ka long ka bym ai jinghun bad la khmih lynti ba kan shim ïa ka sienjam ba dei ban shim halor kane. La bthah ïa ka sorkar jylla ban pynkhreh bad aiti ïa ka kaiphod halor kane hapoh ka 3 tarik u Jymmang.
Ka la ong ba wat hapdeng shibun ki kaiphod ba la ai da ka sorkar jylla ryngkat ka jingbanjur jong u Nongmudui ba la dei ban paw khyndiat ba la pyrshang ban tehalakam ïa ki kali ba kit palat pud ha kylleng ki surok ha ka Jylla, hynrei kam shym la paw satia ban don ka jingpyrshang ban leh ei ei halor kane ka kam.
Ka kaiphod ba kham mynshuwa ka pynpaw ba ki don kumba 16 tylli ki weighbridge kiba treikam ha kylleng ka Jylla bad haba kut jong une u bnai, ka jingdon jong ki weighbridge ba treikam kin nang kiew.
Ka Jylla hynne ka sngi ka pyntip ba 19 tylli ki weighbridge kila treikam bad sa saw tylli kin sa treikam noh hapoh ka artaiew eiei.
Ha kajuh ka por, ym lah ban ïaid lait ba ha ki katto katne ki jaka jong ka Jylla, khamtam ha ki thaiñ Pynursla, Shella, Dawki bad Nongstoin, ki kali kiba kit maw bad wat kiba kit shyiap ki la pyndap smam ïa ka mar bad bun ki ki la ïaid khlem ka jing salia namar ka jingbym don ki jaka ban thew ïa ki.
Ka ïing Bishar ka ong ba watla kam don weighbridge, ka long kaba donkam ba kum kine ki kali, don ki bym don number plate, kim shym la bud ryntih ïa u pud kit mar bad ki bor pynïaid ki leh matlah beit ïa ki ruh.
Ki don ki jaka khamtam ha ki thaiñ Pynursla, ha kaba da ki hajar tylli ki trok la ïohi ba ki ïa ïeng shi jaka, baroh ki dei kiba thmu ban kit maw bad shyiap sha Bangladesh bad ym don kawei ruh kaba bud ïa ka kyndon jingthew bala buh ban kit. Ki don ki jaka ba ki trok kit dieng sawdong ruh kiba kit tam pud.
Nalor kata la pynpaw ba kine ki trok ba kit maw palat pud ki buh ruh ha ka jingma namar lada ki trok ki brake kynsan u maw uba nalor u lah ban shu sied ne hap kaba buh ïa ki kali ba ïaid nadien ha ka jingma bad wat ïa ki briew kiba ïaid lynti ruh lah ban shu duh ei ïa la ka jingim.