Wat hadien ba shah tam ha u NOTA kwah mad u Bah Bindo sa ïa ka elekshon MP

Shillong, Lber 31 : Wat hadien ba u Bah Bindo M Lanong u la shah rem ha ka Election MLA ba dang shu dep shen na ka Nongkrem Constituency da kaba ïoh tang 138 Vote bad dang tam ka NOTA ïa u kaba ïoh 196 vote hynrei kum uwei na ki riew paw khmat ha ka kam saiñ pyrthei hapoh ka Jylla bad uba dei ruh u nongseng ïa ka United Democratic Party (UDP), u la pynpaw ba u kwah mynta ban ïakhun sa ïa ka elekshon MP. Ïa kane u Bah Bindo M Lanong u la pynpaw haba ïakren bad ki nongthoh khubor hynne ka sngi Thohdieng ha ka ïing sah jong u kaba don ha Malki.
“Nga dei u briew ba lah ïaid lut ïa ka ri Khasi bad Jaiñtia bad kawei pa kawei ka shnong nga lah poi lut ha ka por ba nga long kum u MDC. Nga la sahmiet sha khlaw sha btap jong ka shnong Nongkrong bad Phutjalei kaba ïaid na Sonapahar. Na kata kadaw bun kiba ithuh ïanga, nga la long kum u CEM ka KHADC bad bat ruh ïa ka kam ban peit ïa ki kam Hima Sima,” ong u Bah Bindo
“Kata da nga mihkhmat noh ym dei shuh tang kine ki Constituency barit, da mihkhmat noh na bynta ka Constituency kaba heh tharai kan kham sngewbang namar ki paralok suda kat shaba leit,” ong u Bah Bindo da kaba kren biria artad, “Tangba tip kata ka kam ka eh than bad mynta ngam lah ban batai.”
Naduh ba u Bah Bindo u la shah pynduh tiket na ka party UDP ha ka elekshon MLA 2023, uba la hap ban ïakhun kum u kyrtong khlem seng ha ka elekshon kaba dang shu dep na Nongkrem Costituency, haduh mynta u khlem pat rai ïa kano ka party kaba un leit ban pynïasoh.
“Ban ïakhun kat ïa ka elekshon MP kum u kyrtong shimet ka long kaba eh, hynrei ngan sa peit kumno ka long. Nga la long 40 snem kum u nongmihkhmat MLA bad MDC, te da nga mad noh shisien MP nga tharai ka la biang ïanga, te hynrei marwei shimet ka eh than namar kat ka MP dei ban don ha ka kynhun,” la ong u Bah Bindo.
Shuh shuh u la ong ruh ba man uwei pa uwei, ki don beit ka jingthmu ha ka jingim hynrei ban pynlong kam ïa ka jingthmu ka shong pat ha ka nongrim ka long kumno. “Don hi u briew ba khlem jingthmu? hynrei ban pynlong kam ïa kita ki jingthmu ka shong ha ka kata ka nongrim la ka shongnia shong nongrim ne em, lada don ka nongrim ka biang, ka jingthmu kan kham sting, hynrei lada khlem ka nongrim ka shu kut tang ha ka jingthmu,” u la ong.
Haba pyrshang ban kylli na kano ka party ba u kwah ban ïakhun ïa ka elekshon MP, u Bah Bindo u la ong, “Ïa kata te ngin sa ïakynduh pat namar tang kata ka jingthmu ruh ka dang sahkut ha ka jingthmu, hynrei ki lok ki jor kiba la phun shanga ki lah bun ba ki kwah ba ngan ïakhun noh ïa ka elekshon MP,” la ong u Bah Bindo M Lanong.