Pra phum ka UDP ha Pynursla ba ïatreilang ka UDP bad ka NPP hapoh ka MDA-II

Ki muja tang para ma ki ha Secretariat, ki paidbah ki lynñiar

0

Shillong, Lber, 31: Ka jingai jingkyrshan jong ka United Democratic Party (UDP) ïa ka National People’s Party (NPP) hadien ba la kut ka elekshon sha ka Ingdorbar Thawaiñ ka jylla ban thaw ïa ka Sorkar Meghalaya Democratic Alliance (MDA-II) ka la ktah bha haduh katta katta ïa ka UDP ha Pynursla Constituency.
Ha ka elekshon ka UDP bad ka NPP ki la ïakhun la ka jong khlem ka jingïatreilang bad kynthoh ruh kawei ïa kawei pat.
Ki katto katne ki nongïalam jong ka UDP Pynursla Circle ha ka jingïakren bad ki nongthoh khubor ki la pynpaw ïa ka jingsngewsih kthang ba ki nongïalam jong ka UDP Central Body ki dang leit ïakyrsum lang bad ka NPP tang namarba ka UDP kam lah thaw ïa ka Sorkar ki seng riewlum wat hadien ka jingai jingkyrshan jong ka Congress bad ka TMC.
Kine ki nongïalam jong ka UDP Lapalang Unit bad ki katto katne ki tnat ki la pynpaw ïa ka jingpyrshah jur ïa kane ka jingleh jong ki nongïalam ka UDP Central Body ki bym sngap shuh ïa ka sur jong u paidbah ban ym ïatreilang bad ka NPP.
Ka jingïalang jong ka UDP Lapalang Unit kaba la long dang shen hadien ba la ïathir sani bha ka la shim ïa ka rai ba baroh ki nongkitkam hapoh ka jingïalam jong u President u Bah Pyneh Khonglam bad u Secretary u Bah Codimas Khongthohrem ban mih noh shi syndon na ka UDP namarba ki sngew ba kam don jingmut shuh ban dang ïatreilang namarba ka long kumba shet kylla ïa u paidbah khamtam hadien ba ki la ther bha tyngeh pyrshah ïa ka NPP ha ka elekshon katba ynda la dep ka elekshon ki la leit ban ïathaw Sorkar lang.
La ïathuh ruh ba kiba bun ki unit jong ka UDP ha Pynursla Circle ki la pynpaw ïa ka jingbym ïahap ïa kane ka rai ba la shim da ka UDP Central Body ban ïa muja tang para ma ki ha Secretariat katba ki paidbah pat sha madan ki lynñiar bad ki la sngew ba ka Seng Kmie ka la leh ïa ka bym dei khlem da bat ïa ka nongrim kum ka seng riewlum bad ka paw ba ka ibein ïa ki nongkyrshan jong ka parti.
“Lada kim lah ban thaw Sorkar para seng riewlum ruh kan bha ba ka UDP kan shong ha ka Liang Pyrshah namarba ka por kan sa wan ba ka jingkylla kan wan katkum ka sur jong u paidbah,” la pynpaw ki katto katne ki nongïalam.
Katkum ka jingïathuh jong kine ki nongïalam, la sngewthuh ba ki nongkyrshan jong ka UDP bad ki katto katne ki nongïalam jong ki Unit ki lah ban pyrkhat da kum wei ha kane ka elekshon MDC ka ban sa wan lada ka UDP kam ai ïa ka jingpynshai kaba thikna bad kaba shong nongrim.
La ïoh jingtip ba ka UDP Pynursla Circle kan sa shong jingïalang shen ha kine ki sngi ban ïathir sani bha ïa ki kam jong ka parti bad ka jinglong jingman ka saiñpyrthei ha Pynursla Constituency bad kumjuh ha ka jylla.
Kum ban shu pynkynmaw, ka UDP ka la pynïakhun ïa u Bah Anthony Kongwang ha ka elekshon ba dang shu dep pyrshah ïa u kyrtong ka NPP u Bah Prestone Tynsong ha kaba u Bah Kongwang u la shah pynrem kput haduh 8 hajar vote tam.

Leave A Reply

Your email address will not be published.