ïapher ka lyer elekshon ha Sohïong ha shuwa bad hadien ka jingïathep vote 27 u Rymphang

Shillong, Lber 31: Ki nongthep vote jong ka Sohïong Constituency khatduh kin ïoh ïa ka lad ban jied ïa u nongmihkhmat sha ïingdorbar thawaiñ ka jylla kumba long lem kiwei ki 59 tylli ki Constituency ha ka jylla.
Ka Sohïong Constituency ka la duh ban jied lang ïa bad kiwei ki 59 tylli ki Constituency ha ka 27 tarik u Rymphang dei namar ka jingkhlad noh u kyrtong ka UDP, u Bah HDR Lyngdoh tang khyndiat sngi shuwa ban poi ka sngi thep vote. Ka UDP ka la jied noh da u pyrsa jong u Bah HDR Lyngdoh, u Bah Synsharlang Lyngdoh ban long u kyrtong ka Party.
Ka Election Commission ka la pynbna ba ka jingïajied ïa u MLA ka Sohïong kan long ha ka 10 tarik u bnai Jymmang mynta la snem bad ka sngi ban ñiew vote kan long hadien lai sngi, kata ha ka 13 tarik.
Ki kyrtong kiban ïakhun ha kane ka elekshon kin long baroh 6 ngut, kata u Bah Samlin Malngiang jong ka NPP, u Bah Osborne Jana jong ka Congress, u Bah Sandondor Ryntathiang jong ka HSPDP, bad u Bah Synsharlang u bym pat leit thep kyrteng, tangba la thikna ba un ïakhun beit, u Bah Seraph Eric Kharbuki jong ka BJP bad u kyrtong ka TMC, u Bah Stoding Star Thabah.
Haba la pyrshang ban ïaid swait ha ki katto katne ki bynta jong kane ka Constituency, la sngewthuh ba ka jingïakhun hi kan long hapdeng ki lai ngut, kata u Bah Samlin Malngiang, Bah Synsharlang Lyngdoh bad u Bah Osborne Jana. Kaei kaba la ïoh lum na kane ka jingleit ïaid swait ban ïoh ban ïakren bad kiba bun ki nongthep vote ka long ba ka don ka jingkylla ha ka liang ka jingpyrkhat ki paidbah na kaei kaba la long shuwa ka 27 tarik ne ki taïew shuwa ban khlad u Bah HDR bad ka jingpyrkhat kaba la 10 tarik u Jymmang.
“Shuwa ban pynsangeh ïa ka elekshon namar ka jingkhlad noh i Bah HDR Lyngdoh, ka lyer ka beh da kumwei, hynrei mynta ka lah kylla khamtam hadien ba ngi la ïohi ïa ka result jong ka elekshon ha ka jylla”, la ong uwei u rangbah, ubym treh ban pynpaw kata ka jingkylla ka long kumno. Hynrei u la shu ai ksai ba ka jingkylla ka lah ban long ka jingnang ïoh bor ka Seng Congress.
Da kane ka jingbatai une u rangbah, ka kynhun ki nongthoh khubor ka la kyndit bad sdang ban ïaid sha ki katto katne ki shnong bad imat kane ka jingbatai une u rangbah ka lah ban long kaba shisha namar ba kiba bun ruh ki pynpw kumta, tangba ki la ong ba ka NPP bad ka UDP ruh ki dang khlaiñ hi kumba long shuwa ka 27 tarik u Rymphang, tangba ki khamban ba ka Congress te imat ka nang ïoh bor ban ïa kaba ka long shuwa ka jingpynsangeh ïa ka elekshon.
Haba la kylli kaei ka daw ba ka Congress ka ïohbor kynsan hadien ka result jong ka elekshon ha ka jylla, ki don kiba la pynpaw ba ka daw kadei namar kiba bun lyngba ka jingïohi ha ka You Tube ïa ka jingïashong dorbar kaba dang shu dep, dang kham lah u MLA uba shong ha ka Liang Pyrshah namar ba un ïoh kren ïa ki jingeh jong ki paidbah bad jong ka jylla kumba la pynpaw da ki MLA ka Congress bad VPP ha kane ka dorbar.
Uwei u Samla uba la kham nang kham stad u la ïathuh ba ka Sohïong la bun bun snem ka khlem ïoh MLA shuh uba shong ha ka Liang Pyrshah, hynreo la shu îoh u MLA uba shong ha ka Liang Synshar bad don ha ka shuiki bad die namar kane ka daw kiba bun ki jingeh jong ka Constituency ym ïoh ban pynpaw ha ïingdorbar, hynrei la shu shaniah beit ha ka sorkar. Nalorkata ruh u la ong ba ki paidbah kim ju ïohlad ban ïohi ne tip haduh katno u MLA jong ki u tbit namar ba um ju don ha ka liang pyrshah. Ka Sohïong naduh ka por u Bah HDR Lyngdoh ka ïoh u MLA uba don beit ha ka sorkar. Hadien ka jingshah rem jong u ruh, u Bah Samlin uba la jop na ka HSPDP ruh u don ha ka liang synshar bad don ha ka sorkar.
“Ngi la duh ïa ka lad ban pynpaw pyrthei ïa ka sap ïasaid ki nongmihkhmat jong ngi kumba long ki nongmihkhmat na kiwei ki Constituency ba don ha ka liang pyrshah”, la ong ki Samla.
Kawei paw ka daw kaba ki katto katne ki la pynpaw ka long ba ha kane ka sorkar mynta ka NPP, ka UDP, ka HSPDP, ka BJP ki ïashong lang ha ka liang synshar bad lada jop napdeng ki kyrtong, ka shuki Myntri kam don shuh, hynrei satang ki kam Chairman ne kiwei pat ki kam. Hynrei u kyrtong ka Congress pat un ïoh ban pynpaw ia ki jingeh ki paidbah bad un ïoh ban pynpaw nam ïa ka Constituency.
Napdeng ki paidbah kiba la ïoh ban ïakren ki don kiba la pynpaw ruh ba ka jingsynei ne ka vote sngewmyllung ïa u Bah HDR Lyngdoh ruh kan treikam na ka bynta u pyrsa jong u, u Bah Synsharlang bad kane ruh ka lah ban ïarap ïa u. Ha kaba ïadei bad u Bah Samlin ki don kiba la pynpaw ba ula pyrshang hi kum u MLA ban wanrah ki kam pynroi ha Constituency, tangba kim nang ong pat la kine ki kam pynroi kin lah ne em ban khring ïa ka vote ki paidbah.
Kiba bun balang hi ki pynpaw na ka jingïakhun kan long kaba itynnad.