New Delhi, Ïaïong 01 : Ka All India Football Federation (AIFF) ha ka sngi Palei ka la pynlong ka jingpynïapjhiah group bad pyllait paidbah ïa ki kynhun kiban ïakhun ha ka lympung ïalehkai phutbol ki kynthei ka Hero Indian Women’s League (IWL) 2023, kaban sdang ha ka 25 tarik u Ïaïong 2023.
Ka lahduh arsien jong katei ka lympung ka Gokulam Kerala FC bad ka East Bengal FC ki ngat lang ha ka Group A katba ka Sethu FC kaba wan ba ar ha ka samoi ba lah dep ka ngat ha ka Group B ha ryngkat ka Churchill Brothers bad Odisha FC ha katei ka tournament kaba dei ka sien pynlong kaba hynriew hadien ba la pynsangeh ïa ka samoi 2020-21 na ka daw ka jingpynthut ka khlam jingpang Covid-19. Ka lympung kaba nyngkong jong katei ka tournament kadei ha u snem 2016.
Ha katei ka sngi pynïaphiah ïa ki team, kaba la pynlong ha Football House ha New Delhi, la ïadon lang u Secretary General jong ka All India Football Federation u Dr Shaji Prabhakaran.
Haba ai jingkren ha katei ka sngi, u Dr. Prabhakaran u la ong, “Kane ka samoi ïalehkai jong ka Hero IWL kadei kum kawei na ki jingïalehkai knieh rung sha kiwei pat ki league ïalehkai. “Nga kitbok kitrwiang ïa baroh 16 tylli ki team, kiban ïashim bynta ha ka Hero IWL. Ngi la pynlong shibun ki jingïalang ryngkat ki club bad baroh ngi la trei shitom ban nang kyntiew shuh shuh ïa ki kynthei hapoh ka ri ha ka jingïalehkai phutbol”.
Ka samoi ïalehkai 2022-23 kaba dei ka league ïalehkai ba hehduh jong ki kynthei, la phiah ïa ki 16 tylli ki team ha ki ar tylli ki group. Ki saw tylli ki team kiba don ha ki kyrdan ba hakhlieh na kawei ka group kin ïoh rung sha ka knockout stage, kaba kynthup ïa ka quarterfinals, semifinals bad ka final. Ki phra tylli ki team kiba don ha ka kyrdan ba hakhlieh kin ïoh rung beit sha ka Hero IWL jong ka samoi kaban wan, ïa kaba yn sa pynïalehkai hala ïing bad shabar na la ïing.
