Wat la don bun ki bym sngewtynnad ban iohi ba don kiba khot ïa ka jylla Meghalaya kum ka jylla Khristan ne ka Christian State, hynrei kane ka jingong ka la neh kumta hi wat la kam shym la don satia kano kano ka jingthoh ne ka jingpynbna. Hooid ym lah hi ban khot ïa kano kano ka ri ne ka jylla da ka kyrteng jong ka niam ne ka jingngeit, namar ba ka dei ka ri synshar paidbah ne ka Democratic Country bad ruh ka ri kaba laitluid ha ka jingngeit niam ne ka Secular Country. Kane ka long kumjuh ruh ïa ka jylla jong ngi, hynrei kumba ki phareng kiba la synshar ïa kiba bun ki ri ka pyrthei bad kumjuh ruh ia kane ka ri India jong ngi bad ia kane ka jylla Meghalaya la da ki bun bun snem haduh kumba 89 snem ei ei, naduh u snem 1858 haduh 1947 ki la wanrah ruh ïa ka jingngeit khristan sha kiba bun bad kane ka la nangroi khamtam lei sha kine ki thaiñ Ri lum kane ka shatei lam mihngi.
Kumba jan baroh ki Khristan ki tip bad ki kam ka jingïaleh markynti ne ka jingïaumsnam ki long pyrshah ïa ka jinghikai jong ka Gospel, hynrei ka long pat ka phang kaba jylliew ban sngewthuh ïa ka bad i jingkynthoh ba tang kumne im long iba biang ban ai ïa ka rai kaba shai. Kumta ngi ïohi ba wat la kiba bun ki nongshnong shnong ki la dei ki Khristan hynrei kum ka jaidbynriew ki ïai ia ksaid ban ïai dawa ïa ka hok bad ka jingïada kyrpang ia kane ka jaidbynriew rit paidbah ka Bri u Hynniewtrep bad ruh ka jylla Meghalaya hi baroh kawei kaba kynthup ïa ki Khasi-Jaintia-Garo. Naduh shuwa ban kut u snem 2020 ngi la ïohi bad sakhi ïa ki jingïakhih bad ïadei bad ka jingpyrshah ïa ka CAB, CAA bad ka jingdawa ban ïoh noh ïa kata ia ILP bad ka jingwan noh jong ka khlam Covid 19 ka la pynsuki jai lut ïa baroh ki kam ki jam bad ki jingïakhih.
Wat la ka khlam Covid 19 kam pat shym la jah haduh mynta, hynrei ngi la ïohi ba ki sengbhalang ki la sdang biang ïa ki jingiakhih jong ki halor kitei ki phang ba la kdew haneng. Bunsien kum ki Khristan kiba shem mynsiem la ïohi ba ki long kiba jai jai bad ki bym kwah ïa kino kino ki jingïakhih khamtam kiba wanrah ïa kata ka jingnsgew ïapher jaitbynriew. Hynrei hato kam dei mo ka kamram jong ngi baroh iwei pa iwei kum ki nongshnong shnong ka jylla ban don ïa kata ka mynsiem ban iohi ba kum ka jaidbynriew kin ioh ia ka hok jong ka jingiada?. Ka jaidbynriew riewlum kane ka jylla Meghalaya ki long kiba tang shi troh kaba ïa nujor bad kiwei pat ki heh paid ka ri India bad ruh ki heh paid jong ka ri Bangladesh.
Hooid kum ki Khristan lehse kin ym lah shuh ban ïaleh thma pyrshah ïa ka doh bad ka snam, hynrei ngi lah ban ong ba ki don pat ïa ka bynta kaba khraw ban ïakhun ïa ka thma na ka bynta ka ri bad ka jaidbynriew lyngba ki jingduwai bad ki jingïasaid jong ki hakhmat U Blei. Kumba ka jingngeit Khristan hi ka ka ïeng na ka bynta ka jingsuk, ka jingduwai jong kiba bun ki riewngeit kan lah khlem pep ban wanrah ïa ka jingkylla ha kum kine ki por kiba donkam eh bad u Blei un shah shkor ïa ki jingkyrpad bad ki jingduwai kiba kat kum ka mon jong u. U Blei u tip khambha ïa kano kano ka jaidbynriew la ki long kiba heh paid ne kiba rit paid bad khlem pep ka jingeit jong u kan long kaba kyrpang na ka bynta kawei pa kawei ka jaidbynriew bad ngi lah ban ong ba kam long kumjuh, hynrei ka long kyrpang.
Kumba ka Salm 33:12 ka ong suk kata ka jaidbynriew kaba U Trai u long U Blei, kan long ruh ka nongrim ïa ki riewngeit ka jylla bad ka jaidbynriew ban pynshong nongrim ïa ka jingkyrpad jong ki hakhmat U Blei. Shisha ngi khmih lynti ka jingshim khia jong ki riew ngeit ban ïasnoh kti lang bad ki samla kiba ïakhih lyngba ka jingduwai kan wanrah ïa ka jingkylla kaba kham pher bad kaba U Blei un leh phylla. Kumba ka jaidbynriew Hynniewtrep ka long ka jaidbynriew kaba kyrpang kumta ruh U Blei un isynei ban peit ïa ki jingeh jong ka bad sngap ïa ki jingduwai jong ki nongshnong shnong jong kane ka jylla. Ki nongialam sengbhalang ki donkam ïa ka jingkyrshan bad ka jingai mynsiem khnang ba kita ki jingpyrshang jong ki kin long kiba seisoh bad kiba wanrah jinghun lang ia baroh.
