Shillong, Ïaïong 20 : Ka sorkar jylla hynne ka sngi ka la shim ïa ka rai ban pyndam noh ïa ka Memorandum of Agreement (MoA) bad ki kompeni kiba pyntrei ïa ka projek bording jong ka Kynshi na ka daw ka jingtyngkhuh noh bad ki jaka ba don u Uranium.
Haba kren bad ki lad pathai khubor hadien ka review meeting bad ki kompeni ba pyntrei ïa ki projek bording ha ka jylla naduh ki phew snem ba la dep, u Symbud Myntri Rangbah ka jylla, Bah Prestone Tynsong u la ong, “Kawei na kitei ki projek ba ki kompeni ki kynran dien noh kadei ka Kynshi Stage-1 ba la ïasoi bad ka M/s Athena Kynshi Power Private Limited. Ngi la rai ban pyndam noh ïa ka MoA jong kane ka projek.”
Shuh shuh u ong ruh ba ïa ka Kynshi Stage -II ba la ïa soi bad ka JP Meghalaya Power Ltd, ki kompeni ba pyntrei ïa ka ki la pynpaw ba kim la shuh ban bteng ïa ka kam bad kumta sorkar ka la hap ban pyndam noh ïa ka MoA.
U Symbud Myntri Rangbah u la ïathuh ruh ba ka daw ba ki pyndam noh ïa ka projek ha Kynshi kadei hadien ba ki la ïoh jingtip na ka Ministry of Forest and Environment ba ka tyngkhuh bad ka jaka ba don u Uranium. “Kumta, halor katei ka nongrim ki la rai ban kynran dien noh bad pyndam noh ïa ka MoA hapdeng ka sorkar jylla bad kitei ki kompeni,” u la bynrap shuh shuh.
Ha kajuh ka por u la ïathuh ruh ba na ka liang ka MeECL ki la thmu mynta ban tei pat sa ïa ka Stage-III jong ka Leshka Project bad mynta na ka liang ki engineer bad ki stad ba dei peit ia katei ka bynta ki dang pynkhreh ïa ki jingdonkam baroh.
La ïathuh ruh ba ha kaba ïadei pat bad ka Umïam stage I bad stage- II ka soskular ka la jan dep artad bad shen kin sa rah ïa ka sha ka kynhun myntri ban soi ïa ka MoA. Ka Umïam stage – 1 kadei kumba 50MW bad ka Umïam stage – II pat ka dei 100MW.
