Shillong, Ïaïong 20 : U Symbud Myntri Rangbah ka jylla, Bah Prestone Tynsong ha ka sngi Balang u la ong ba ki pdiang sngewbha ïa ka komiti ban khlieh da u Nongbishar ba la shongthait ka ban bud dien bad ai jingmut ïa ka sorkar jylla na ka bynta ban pyntreikam ryntih ïa ki hukum ka ïing bishar Supreme Court (SC) bad National Green Tribunal (NGT) ha kaba ïadei bad ka jingtih bad jingdie ïa u dewïong uba la dep tih lypa bad lum thup ha kiba bun ki jaka.
“Na ka liang ka sorkar ngi sngewkmen halor ka jingthaw ïa kane ka komiti ban khlieh da u Nongbishar ba la shongthait. Ka bha namar ki briew mynta ki kynthoh beit ïa ka sorkar MDA bad kumta nga kyrmen ba kane ka rai ba shim da ka High Court ki paidbah kin sa sngewthuh ba ka sorkar jylla ka la leh ïa kaba donkam bad lada ym dei kumta, kane ka komiti ka don kan sa leh ïa kaba donkam,” u la ong haba kren bad ki lad pathai khubor.
Da kaba kam ba ka sorkar jylla ka ïakhun pyrshah ïa ka jingtih bad khaïi beaiñ ïa u dewïong, u Symbud Myntri Rangbah u la ong ruh ba ki la don lypa ki bor distrik la ka long naduh DC haduh SP ban peit baroh 24 kynta khnang ba kito ki briew kiba lap ba ka don kum kata ka jingïaid beaiñ ki trok dewïong ki lah ban pyntip bad ujor sha ki pulit mardor lane sha ki bor distrik ban leh ïa kaba donkam.
“Kam da donkam than ba phin pyntip ïanga ne ïa u Myntri Rangbah namar tang ha ki bor distrik ruh la lah ban leh katkum ka hukum ba la phah sha baroh ki bor pynïaid distrik la ka dei ïa ki DC ne SP,” la bynrap shuh shuh u Bah Prestone.
Nalorkata, u la ong ruh ba lada ka don pat ka jingkwah ban ïoh shuh shuh ïa ka jingtreikam kaba khuid, na ka liang ka sorkar ki pdiang sngewbha namar haduh mynta hi dei ka sorkar hi kaba shah kynnoh.
“Baroh shi katta ki la shu kynnoh ba ka sorkar ka leh kumne, ka leh kumtai kumta ka bha shibun bad kumta ka sorkar ka pdiang sngewbha ïa kane ka rai jong ka Court.”
Lah ban kdew hangne ba ka ïing bishar ka la bthah ruh ïa une u nongbishar ba la shongthait ban ai ïa ka kaiphod ba nyngkong eh hapoh ka saw taiew halor ki hukum ka ïing bishar SC bad NGT kumno ka sorkar ka pyntreikam ïa ki bad lada jia bym pat pyntreikam lut kiei ki lad ki lynti ba dei ban leh kloi ban peit ba ka jingpyntreikam ka long kaba ïaid beit ïaid ryntih. Nalor kane la bthah ruh ïa u nongbishar ba un peit ba kam dei shuh ban dang bteng ka jingtih dewïong beaiñ ha ka jylla Meghalaya.
