ïakynduh ka AIM ïa ki bor pynïaid ka Synod College ba ujor ki khynnah halor ka jingpynbor deng mask

Shillong, ïaïong: Ka kynhun Awaken India Movement (AIM) Meghalaya State Unit hapoh ka jingïalam jong u Bah Banshai Marbaniang Chairman, ha ka 19 tarik mynta u bnai ka la ïoh ban ïakynduh ïa u Principal ka Synod College u Bah R. M. Lyngdoh, ha Jaiaw, Shillong halor ka jingujor ba la ïoh pdiang na ki khynnah pule jong katei ka college ha kine ki sngi ha ka ba ïadei bad ka jingpynbor ban deng ïa ki mask.
Ka jingleit ban ïakynduh ka AIM ïa u Principal jong katei ka College kalong halor ka jingujor napdeng ki khynnah pule sha ka kynhun AIM ha kaba ïadei ba ka jingshah pynbor ki khynnah pule hapoh ki nong pynïaid jong ka College da kaba phah jubor ïa ki khynnah pule ba ki dei ban deng ïa ki mask ban ïada na ka Khlam Covid-19, ba dei ban ai Tika Covid haba ki wan shapoh ka jaka pule lem kumta kin nym ïohlad ban wanrung shapoh college.
Kum ka kynhun ka pynpaw ba ki khynnah pule ki la phah ruh ka jingujor halor ka jingshah khot haduh u Vice-Principal na ka bynta ba ki khlem deng ïa ka Mask bad kila shah knieh noh ruh shisyndon ïa ki ID Pule jong ki namar ba kim treh ban deng ïa ka mask wat hadien ba kila shah pynbor. Ka AIM ka la ïoh ban phah ïa ka Dorkhas (Representation Letter) sha u Principal ha kane ka sngi ha ka ba ïadei bad ka jingshah pynbor ki khynnah pule da kaba pynpaw shai ba ka jingdeng mask, leh Test ne wat haduh ka jingai Tika Covid-19 ka dei ban long da ka jinglaitluid (Voluntary) katkum ka mon lade shimet khlem da don kano kano ka jingpynbor (Not Mandatory). Ka AIM ka la kdew shai kumjuh wat haduh ki kyndon kiba na ka liang jongka Sorkar Kmie jong ka Ri India kala batai ha kaba ïadei bad ki bynta kumba dei ban pynïaid (Central Government Guidelines) halor ka jingpyntreikam ïa ka jingïada halor ka Khlam Covid-19.
Ka AIM lyngba ka jingthoh ka la pynpaw ruh halor ka jingkren u Myntri uba bat ïa ka Ministry of health & Family Welfare jongka Sorkar Kmie u Mansukh L. Mandaviya ha kaba u la ong ba “Ka jingai Tika Covid ïa ki Khynnah kiba 12 snem haduh 17 snem kan ymdei ban jia shuh ha kano kano ka por khlem da ïoh ban kdew lyngba ki expert scientist kiban pynshisha bad yn ym dei ruh ban don kano kano ka jingbthah kyrkieh halor katei ka bynta”.
Ka AIM lyngba ka dorkhas ka la pynpaw sha ki nong pynïaid jong ka Synod College ba dei ban pynbeit ryntih katkum ki kyndon aiñ (Liability) halor ka pule puthi khlem da pynbakla ne wat ban wanrah ka lynti ban ïalam da kaba pynbor halor ka jingpang khlam kum ban shu ñiew noh kum ki mrad ban shu leh examin da kaba pyrshang (Experimental works on animals) haduh wat ban buh ïa ka jingim ki khynnah pule halor ka jingma kaba ap jingtieng bakhraw ha ka lawei lashai hadien habud. Ka AIM lyngba ka Dorkhas kala pynpaw ruh sha katei ka college lyngba u Principal ba ka jingïohlad ban plie pat sa shisien ïa ki jaka pule hadien ka lockdown kam dei ban shah ïalam bakla bad ruh ba dei ban pyndonkam katkum ka jinglaitluid jong ka pule puthi kumba dei ban long naduh kaba sdang khlem da donkam ban deng Mask, sait kti man ka bynta bad ruh bymdei ban bud ïa kiwei kiwei pat ki bynta ha kaban pyniaid halor ka Khlam Covid-19 (Protocols).
Nalor kata ka AIM ka la pynpaw ba lada kum katei ka bynta kan wan jia hapoh ki jaka pule kiba don ha ka Jylla da kaba kin dang ïai pyndonkam manla ka por, ka lah ban dang wanrah ïa ka jingtieng jingsmiej kaba jur ïa ki khynnah pule kiba bun ne wat haduh ba kin hap ban iehnoh shisyndon ïa ka pule puthi ka jong ki. Ka AIM ka sngew ruh ban ong ba lada kumne kan ïai jia manla kapor kalah ban pharia halor ka jingïadei para khynnah pule ne wat ban wanrah ruh ka jingïapait ïa pra da kaba pyrshang ban synshar donbor (Divide & Rule Policy) hapoh ki jaka pule bad ki Shnong bapher bapher.
Kane ka kynhun ka la ong ruh ba kala ïoh ban kdew shai katkum ka jingthoh ba la mih lyngba ki stad wat bniah (Scientific Journal) jong ka International Journal of Environmental Research and Public Health (IJER & PH) kaba la pynpaw shai da kaba ong “Ba ka jingdeng ïa ki Mask hapoh ka met jong ki briew kam long ka ba shngaiñ da ka ba kan wanrah ïa ka jingjaboh halor ka jingring mynsiem, wanrah ïa ka jingkieng khlieh, kyntiew ïa ka Blood Pressure (BP), yndang pyntlot ïa ka jingtied Klongsnam, pyntlot jingmut jingpyrkhat, pyndait ïa ka met, pyntlot met bad kiwei kiwei ki jingpang kiba lah ban dang wanrah shibun hapoh ka met briew.
Shuh shuh ka AIM kala ïoh ruh ban pynpaw halor ka jingbatai jong ka Indian Council of Medical Research (ICMR) kaba don hapoh New Delhi halor ka jingdon kam ïa ki RT-CPR test, RAT test bad kiwei kiwei ki bynta jong u covid hapoh ka met jongki briew kadei ban long tang ïa ki briew kiba don ka jingpang ym dei ïa kito ki bym don jingpang. Ka ICMR ka la kdew ruh ba ki nongpang lada ki kwah ban pyndep ïa ka Test ne wat ban ai ïa u Tika COVID-19, ka dei banlong katkum ka mon laitluid jong kiba haïing hasem kiba phah ban sumar.