Shim bynta haduh 26 kynhun na kylleng ka District

Jowai, Ïaïong 20: Ïa ka ‘33rd District Level Industrial Exhibition-2022’ la pynlong mynta ka sngi 20 tarik daka ophis jong u General Manager District Commerce & Industries Centre, Jowai West Jaiñtia Hills District shi bynta na ka jingrakhe ïa ka jingdap 50 snem jong ka jingïoh ïa ka jylla ba pura.
Ïa kane ka prokram mynta ka sngi la pynlong ha Ladthalaboh Indoor Sports Hall, Jowai ha kaba u MLA ka Jowai Constituency u ma Wailadmiki Shylla ula long kum u kongsan, ryngkat ka jingdonlang u General Manager ka DC&IC ma P. Toi uba pynïaid ïa ka jinïalang lem bad kiwei de kiba la shah khot sngewbha.
Na ka liang ki kynhun treimon sngewbha haduh 26 tylli jong ki Society bapher bapher lem bad na kiwei de ki tnad sorkar ka District kila wan sha kane ka jingpyni nam kum ka lad ban pynïaid ïew ïa ki mar rep bad ki jingshna tynrai jong ki sha kane ka Exhibition ïa kaba la pynlong biang mynta ka snem 2022 hadien jong ka sien ba khadduh ba la pyn long ïa ka ha ka snem 2016.
U ma Wailad haba ai jingkren kum u kongsan ula ong ka jingpynlong kum kine ki rynsan pyni nam pyninam kan ïarap shibun eh ïa ki nongrep ka thaiñ ba kin ïoh lad ban pynpaw pyrthei ïa ka sap ka pong ba ki don. ‘Ka por ka donkam mynta ban wad ki lad ki lynti kumno ban pynïaid ïew ïa ki mar rep” da kaba u kyntu ïa kane ka ophis ba kan pynlong manla ka snem kum kane ka Exhibition bad kumjuh ïa ki prokram ai jinghikai na ka bynta ki nongdie jingdie ïa ki mar rep ba yn lah ban pynïaid ïew ïa ki sha kylleng ka pyrthei.
Ula ong ruh ‘kumba long mynta kiba bun na ka samla ka jylla ki don hapdeng ka jingkyrduh kam kyrduh jam wat naka liang ka sorkar ruh kam lah shuh ban pynbiang ïa ka kam sorkar ha manla uwei pa uwei, kumta ka sorkar ka la wad ki lad ki lynti ba ki khun samla kin pylleit jingmut haka kam la jong’.
Na ka liang ka sorkar ula pyntip ruh kala ai ka jingïarap lyngba ki skim Prime Minister Employment Generation Programme (PMEGP) ha kaba ka khun samla ki lah ban seng ïa ki kam la jong, da kaba ai nuksa ïa uwei na ki khun samla uba la plie ïa ka jaka ai jinghikai Computer da katei ka skim ha Jowai.
Shuh shuh ula pyntip ba ka sorkar kala pynïoh jingïarap ruh ïa ki nongrep ka jylla lyngba ka FOCUS ha kaba ki nongrep ki lah ban ïoh da kaba kin seng ïa ka kynhun jong ki.
‘Ha kum kine ki sngi jong ka jingkyrduh kam kyrduh jam ula kyntu ïa ki khun samla ba kin long kiba mihnot thop haki jingtrei jingktah la ha kino kino ki kam, ula pynsngew ruh hapoh ka jylla wat ïa ka kam ñiah JCB ym pat don kiba shim da ki trai jylla hynrei ïa kane ka kam la shim beit da ki briew ba nabar.
Kane ka kam ka long kaba heh bha ha ka jingsiew kaba la poi sha ka 15 hajar tang na ka bynta kito kiba dang sdang ryngkat ka bai bam kaba khadsan spah shi taiew, katba ïa kiba ñiah ïa ki JCB (Chain) ka la poi sha ka 35 hajar tyngka lem bad ka bai bam 2 hajar shi taiew ïa kito kiba dang sdang ïa ka kam. Ula ai nuksa ïa kiwei de ki kam kum ka ka ot shñiuh bad ka kam ri masi ba ki samla ki lah ban shim.