Shillong, Lber 20 : U Myntri Rangbah ka Jylla Conrad K Sangma mynta ka Lah Sngi U Blei, ula ong ba ka Jylla Meghalaya ka dei kawei na ki katto katne ki Jylla kaba la ïoh buskit na ka sorkar pdeng da ka song pisa bynrap (Addl fund) ba T. 300 klur kum ka jingaitam (bonus) namaba ka lah ban pyntreikam pura ïa ka Capital Investment Fund (CIF).
Haba ïakren bad ki nongthoh khubor, u Conrad ula ong ba ka Jylla kala pyntreikam ïa ka song pisa ha ka rukom kaba dei ha ki project bapher bapher bad ki skhim bapher bapher. Ula ong baka Capital Investment Fund (CIF) ka dei kaba la ai sha baroh ki Jylla kum ka nongmuna na ka bynta ka roi ka par.
“Namar kata, ngi la kyrpad ïa ka Sorkar India ban ai ïa ka song bynrap kum ka jingaitam sha ngi namar ngi la lah ban pyndep bad pyntreikam pura ïa ka CIF. Nakata ka daw, ka Meghalaya ka dei kawei na ki katto katne ki Jylla kaba la ïoh ïa ka song bynrap. Hadien ba nga kyrpad ïa ka Sorkar pdeng, ngi la ïoh biang sa 50% ka pisa bala ai sha ngi. Ngi la ïoh T. 600 klur haba sdang bad ngi dei kawei na ki katto katne ki Jylla kiba la pyndep hapoh u 2022-2023 bad mynta ngi la ïoh sa T. 300 klur” ula ong.
Haba kdew ïa ka jingleit Delhi jong u ba dang shen, u Myntri Rangbah ula ong “Hadien ka elekshon bad dep bam smai kum u Myntri Rangbah ha ka sien kaba ar, nga sngew dei ba ngan hap leit ïakynduh ïa ki Myntri ka Sorkar Pdeng bad buh jingkyrpad ha ki ba kumba kila kyrshan ïa ka Sorkar Meghalaya ha ki san snem bala lah, kin ïai bteng ban leh ïa kane bad kane ka dei ka jingïakren kaba ngi la ïakren”.
“Hooid ki don kiwei ki ishu kiba hap ïakren bad ki Ministry kiba ngi la dep ïakren bad ngi la ïoh ïa ka jubab kaba sngewtynnad la ka dei ha ka Tnad Pule Puthi ba ïadei bad ka CUET lane ka CIF na ka Finance Ministry” ula ong
Haba kylli la ka Sorkar kan buh jingkyrpad pyrshah ïa ka hukum ba dang shen jong ka ïing Bishari High Court ka jylla ban phah ïa ki CISF ba kin tehlakam ïa ka jingkhaïi beaiñ ïa u dewiong, u Myntri Rangbah ula ong “Ka Sorkar ka dang bishar ïa kane bad kan sa shim ïa ka rai ha kine ki khyndiat sngi ban wan”.
Halor ka jingkam u Myntri Rangbah ka Assam ba ka Mukroh ka dang hap sha Assam, u Conrad ula ong “Ngi la kren shai naduh ka sngi ba nyngkong ba ka Mukroh kam dei satia ka jaka ba ïakajia. Ka Mukroh ka dang hap hapoh u pud u sam ka Meghalaya bad kane ka dei ka nongrim ba ngi ïeng bad ngi la kren shai naduh ka sngi ba nyngkong”.
Haba ïadei bad ka hukum ka ïing Bishar ban pynbeit noh ïa ka kam ba ïadei bad ka jingpynkynriah ïa ka Them Metor, u Myntri Rangbah ula ong “Ngin sa rai ynda ka la poi sha ka Sorkar…ai ba ka High Level Committee (HLC) kan pyndep ïa ka kam”.
