Shillong, Nailar 14: Ka ïing Bishar High Court ha ka Sngi Palei kala pynpaw ïa ka jingbym sngew tynnad halor ka jingkynnoh ba khlem pyntreikam ïa ka hukum ban thung biang ïa u Pa’iem Ainam Manik Syiem kum u Syiem ka Hima Mylliem, haba bthah ïa ka Jylla ban ai jingtip ïa ka jingpyntreikam hashuwa ban kut ka sngi.
Haba shong bishar ïa ka mudui pynkheiñ hukum (contempt petition), la pyntip ïa u Justice HS Thangkhiew ba watla ka ïing Bishar ha ka 11 tarik Nailar kala pynmih ïa ka hukum ba kheiñ iap ïa ka jingthung Acting Syiem, uba dei u nongshah mudui No 4, u Acting Syiem um pat shym la aiti satia ïa ka kam.
U nongïasaid aiñ u nongmudui, u L Khyriem ula pyntip ba ka ïing Bishar kala bthah “ban thung biang noh ïa u Pa’iem Ainam kum u Syiem ka Hima Mylliem bad ba ïa ka hukum thung Acting Syiem la kdat noh sharud bad kheiñ iap”
“Wat hapdeng kine ki jingbthah kiba shai, u nongshah mudui N0 4 (Acting Syiem) ula kyntait ban aiti ïa ka shuki bad pyllait ïa ka Ophis….ïa u shabi jong ka kamra ka Ophis ruh u dang don beit bad u” ong u Bah Khyriem.
U Nongïasaid aiñ jong ki nongshah mudui HL Shangreiso ula pan por ban pynshisha ïa ki jingkynnoh ba u khlem pynksan ba kam shym la don ka jingpynmih ïa ka hukum thung biang. ïa ka notice lah hukum ban phah sha u Acting Syiem.
Ka ïing Bishar ka ong ba ka hukum ba 11 tarik Nailar kam shym la don eiei shuh ban nang sngewthuh bakla.
“Kala shai ba ka jingthung ïa u Acting Syiem kala shah kheiñ iap bad um dei shuh u Acting Syiem. Haba pyntreikam ïa ka hukum kane ka ïing Bishar, u dei ban pyllait noh mardor ïa ka Ophis bad aiti noh ïa ka shuki” ong u Justice Thangkhiew.
Haba pynpaw ïa ka jingbym sngewtynnad ïa kane ka jingbym kohnguh, ka ïing Bishar kala maham ba ka lah ban ai jingpynsaja pynkheiñ hukum ne contempt. ïa kane ka mukotduma la buh ban bishar biang ha ka 17 tarik Nailar, 2026.
