Shillong, Iaiong 19 : Da ka mynsiem kaba sngewkhia halor ki kynrum kynram jong ka jingpynbeit ïa u pud u sam hapdeng ka Meghalaya bad Assam u MLA ka Mawlai Constituency u bah Process T Sawkmie u la kyntu ïa ka Sorkar jylla bad ka KHADC ba kin ïatrei lang ban pynshai bad pynsngewthuh ïa ki bor synshar shnong bad ki paid khappud halor kane ka kam khnang ba kan ym wanrah ka jingduh nong ïa ki paidbah ka jylla hynrei ba kan wanrah ka jingmyntoi.
Haba ïakren bad u nongthoh khubor u bah Process u la ong “ Nga sngew khia jur halor ki jingmih ki kynrum kynram ha kaba ïadei bad ka jingpynbeit ïa u pud u sam. Ha ka jingshisha ka donkam ka jingïatrei lang ka Sorkar bad ka KHADC da kaba ïa kynduh bad iakren shai kdar ba ki paid khappud halor kane ka kam namar ka long da shisha ka kam kaba jwat ha kaba la 50 snem mynta ym pat lah ban ïa pynbeit hynrei lada ïatrei lang ki bor synshar Sorkar, KHADC, Shnong khappud, ki paid khappud lehse da ka jingïasngew thuh jingmut lang lah ban pynbeit ïa kane ka kam namar haba shim ïa kano kano ka rai ka dei ban long kaba ai jingmyntoi ïa ka jylla bad ïa ki paid nongshong shnong hi jongka jylla”.
Nalor kane, kumba ka paw ki khlieh nongsynshar, ki paid khappud ki pynpaw ka jingbym hun halor ka soskular ne ka MoU ba la ïasoi da u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma hakhmat u Myntri Kam pohiing ka ri u Amit Shah. Kumta halor kane ruh ka donkam ïa ka sorkar bad KHADC ban ïatrei lang bad ïakren da kaba sngewthuh shai kdar bad ki paid khappud namar lada donkam jingpynkylla ruh hap hi ban leh namar lada ïa kiwei ki aiñ lah ban pynkylla ïa kane lei lei kaba dang shu iasoi soskular kam don jingeh satia. Namar u la ong kumba ka long mynta kan hap ban jurip ka Survey of India ïa ki jaka puta ban pynbeit ïa uta u pud bad hadien kane kan sa leit sha ka ïing dorbar Parliament kumta kan dang shim por kane ka kam bad lada dei ban pynbeit dei ban ïa pynbeit noh hi kloi ïa kane ka kam khnang ba kane ka jingpynbeit pud kan pynhun lut ïa baroh ki paid nongshong shnong ka jylla.
