Shillong, Ïaïong 18: U Myntri jong ka tnad ïalehkai jong ka sorkar jylla u Bah Banteidor Lyngdoh u la pynbna ba ka jylla kan sa pynlong noh shen ïa ka Meghalaya Games ha u Jymmang bad ïa ka NorthEast Olympics ha u Risaw-Naiwieng 2022.
Ïa kane u Myntri u la pynbna haba kren kum u symbud kongsan ha ka jingplie pyrda ïa ka lympung ïalehkai Senior National Table Tennis Championship kaba 83 ha Indoor Training Centre jong ka SAI ha NEHU.
U la ong ba ka sorkar jylla ka don ka thong ban kyntiew ïa ki kam ïalehkai hapoh ka jylla da kaba pynlong ïa kiba bun ki lympung ïalehkai kiban ai mynsiem na ka bynta ki nongïalehkai ba kin pynpaw pyrthei ïa ka sap ïalehkai kaba ki don.
“Ban kyntiew ïa ka kam ïalehkai donkam ban don ki lympung ïalehkai bad na ka liang ka sorkar jylla ka ai ka jingkyrshan kaba pura ïa kane ka championship kaba dei ruh kawei napdeng lai tylli ki lympung ba ka Meghalaya kala buh jingmut ban pynlong mynta u snem.”
U la pynpaw ruh ba ïa kane ka championship la dei ban pynlong ha ki bnai ba lahdep hynrei na ka daw ka jingshah pynthut ha ka khlam jingpang Covid-19 ïa kane ka lympung la pynsangeh noh.
“Ka Meghalaya kala ïoh ban pynlong ïa ka Meghalaya Games jong u snem 2018-19, bad ha u Jymmang ka Meghalaya kan pynlong biang ïa kane ka lympung bud pat sa ka NorthEast Olympics ha u Risaw-Naiwieng 2022,” ong u Myntri.
U Myntri u la pdiang sngewbha ruh da ka jingkmen ïa ki nongïalehkai kiba ïashim bynta ha ka Senior National Table Tennis Championship bad kyrkhu kyrdoh ba kin ïalehkai bha ban ïoh ïa ka jingjop. U la ai khublei bad ïaroh ruh ïa ki nongpynïaid kiba la shimkhia bad kiba la trei shitom ban pynurlong ïa kane ka lympung.
