Da ka jingsngap jar ba shi minit, sdang ka lympung ïalehkai Senior National Table Tennis Championship ha Nongbah Shillong

Shillong, Ïaïong 18: Ka lympung ïalehkai Senior National Table Tennis Championship kaba 83 kala sdang ha ka 18 tarik Ïaïong ha Nongbah Shillong kaba la pynlong ha Indoor Training Centre jong ka Sports Authority of India (SAI) kaba don ha North-Eastern Hill University (NEHU).
Ïa kane ka lympung la sdang da ka jingsngap jar ba shi minit ban sngewlem ïa u samla Deenadayalan Vishwa, u rangïalehkai na Tamil Nadu uba la khlad noh na kane ka sla pyrthei ha ka jingjia tyngkhuh kali kaba la jia ha ka sngi U Blei ha Shangbangla, Ri-Bhoi District katba u dang thmu ban wan sha Nongbah Shillong ban wan ïashim bynta ha kane ka lympung.
Ïa kane ka lympung bala pynïaid da ka Meghalaya Table Tennis Association (MTTA) da ka jingkyrshan ka sorkar jylla la plie pyrda da u Lamphang ka ïing dorbar thaw-aiñ jong ka jylla u Bah Metbah Lyngdoh uba la long kum u kongsan, ha ka jingdonlang u Myntri jong ka tnad ki kam ïalehkai u Bah Banteidor Lyngdoh. La donlang ruh ha kane ka sngi ka Director jong ka tnad ïalehkai ka Kong Wanri AM Booth, ki nongkitkam jong ka MTTA, u Working Presdient bad secretary jong ka MSOA bah Joh F Kharshiing bad bah Finely Pariat bad kumjuh ruh ki referee kiba pynïaid ïa ki jingïalehkai.
Ha kane ka lympung kaban kut ha ka 25 tarik ki don haduh 450 ngut ki nongïalehkai kiba ïashim bynta kiba la wan na ki jylla bapher bapher jong ka ri kynthup ruh ka jylla Meghalaya ba kynthup ïa 38 tylli ka kynhun jong ki shynrang bad 35 ki kynthei kiban knieh ïa ka nam lahduh.
Na ka liang u Bah RG Lyngdoh President jong ka Meghalaya Table Tennis Association haba kren pdiang u la pynpaw ka jingsngewkmen ïa ka jingwan ïashim bynta ryntih jong ki nongïalehkai na ki jylla bapher bapher bad khmih lynti ba kane ka jingïalehkai kan ïaid beit ïaid ryntih. U la pynpaw ruh ka jingsngewsih bad kyndit halor ka khubor ka jingkhlad u samla Deenadayalan Vishwa bad phah ruh ka khubor sngewlem sha kiba haïing hasem.
Halor ka jingkhlad u samla Deenadayalan Vishwa, na ka liang u Lamphang bad u Myntri Sports kila phah ka khubor sngewlem sha kiba haïing hasem bad kiba ieit ba thoiñ.
Na ka liang u Bah Banteidor Lyngdoh u la shim ka bynta ban pule ïa ka khubor sngewlem ha ka liang ka sorkar, ha kaba u la pynpaw ba ka jingkhlad noh utei u rangïalehkai dang khie bad tbit ka long ka jingduh kaba khraw ïa ka sports hapoh ka jylla. “Ka jingnoh synñiang jong u ha ka kam ïalehkai yn ïai kynmaw junom. Ha kaba kum kane ka khyllipmat jong ka jingsngewsih, nga phah ka khubor sngewlem sha kiba haïing hasem,” ong u Bah Banteidor Lyngdoh.
U Myntri u la pynpaw ruh ba ka sorkar jylla ka ai ka jingkyrshan kaba pura ïa kane ka championship kaba dei ruh kawei napdeng lai tylli ki lympung ba ka Meghalaya kala buh jingmut ban pynlong mynta u snem.
U Bah Metbah Lyngdoh haba kren kum u Kongsan u la ong ba u dap da ka jingsngewkmen ban ïohi ba ki samla ïalehkai na ki jylla bad ki kynhun bapher bapher kila wan sha Nongbah Shillong ban ïashim bynta ha kane ka championship.
“Ka long ka jingjop kaba khraw ka Meghalaya kan ïoh ban pynlong ïa kane ka lympung kaba la ïarap ïa ka Table Tennis Federation of India ban ai pynlong ïa kane ka championship hapoh ka jylla bad ka burom ka long long na bynta u myntri ka tnad ïalehkai, ïa ka tnad Sports and Youth Affairs, ka MTTA bad kiwei kiwei,” ong u Lamphang.
Ha kane ka sngi sdang la pynlong ïa bun tylli ki jingïakhun jong ki kynhun. Ka Railway Sports Promotion Board (RSPB), Bengal A, Haryana, Petroleum Sports Promotion Board (PSPB), Maharashtra A, Tamizhaga Table Tennis Association (TTTA), Maharashtra B bad Karnataka kidei ki kynhun kiba la lah ban ïalehkai bha hadien ar wat jong ki jingïalehkai.
Ha kane ka lympung ki ar tylli ki team na kawei ka group kin rung sha ka knockout stage.
Kum ban kdew hangne ka jingpynlong jong ka jylla ïa kane ka lympung ka long ruh shi bynta ka jingrakhe ïa ka jingdap 50 snem ka jingïoh la ka jong ka jylla ba pura.