Lyngba ka Selection Camp jied ka MDSA ïa ki khynnah ban mihkhmat sha ka Meghalaya Games 2022

Mawkyrwat, Ïaïong, 17: Ka Mawkyrwat District Sports Association (MDSA) lyngba ka Athletics Committee mynta ka sngi ka la ïoh ban pynlong ka Selection Camp (SC) ha madan Mawmerïong jong ka shnong Sakwang, South West Khasi Hills District ban jied na ka bynta ki khynnah ïalehkai ki ban sa mih khmat ïa ka South West Khasi Hills District ha ka Meghalaya Games 2022 ha Shillong ka ban sdang naduh ka 2 haduh 7 tarik u Jymmang, 2022.
Haba kren ha ki lad pathai khubor, u Jompsingstar Ramsiej, Secretary In-charge ka Athletics jong ka Mawkyrwat District Sports Association (MDSA) u la pynpaw ka jingaikhublei kaba kyrpang na ka bynta ki khynnah samla kiba la wan mynta ka sngi ban ïashimbynta ha kane ka Selection Camp ba kin long ki khynnah ban sa mih khmat ïa ka distrik ha ki jingïalehkai bapher bapher ha Shillong.
U la ong ruh ba ka jingthmu jong kane ka Selection Camp (SC) ka long ban jied ïa ki ‘rang bad ki ‘thei ïalehkai ba kynsai ba kin sa leit ban ïa khun ha ka Meghalaya Games 2022 kaba ynsa pynlong shen ha Shillong, East Khasi Hills District. U la ïathuh ruh ba ha ka jingwan jong ki khynnah samla ha kane ka SC kim da bun eh namar ka jingpyntip ruh ka la long ha i por iba lyngkot, hynrei watla kata ruh kum ki nongpynïaid ki la ïaleh hi ban phah ne pyntip ha manla ki shnong.
U la ïathuh ruh ba kane ka jingpynlong ïa ka Selection Camp ne ka jingjied na ka bynta ki khynnah samla kiba leit ïa shimbynta ka la long ruh ha ka sien kaba ar, “ka jingpynlong kaba nyngkong ka dei ha madan jong ka shnong Sohkhyllam, South West Khasi Hills District kaba dei ha u snem 2020”, u la ong.
Na ka liang u Working President jong ka Mawkyrwat District Sports Association (MDSA), u bah Y.G. Lyngdoh pat u la ïathuh ba hadien jong ka jingïalang ne committee kaba la long ha kine ki khyndiat sngi ki la shim ïa ka rai ban bynshet ha ka Athletics Committee ba kan shim ïa ka bynta ban pynlong ïa ka Selection Camp ban jied ïa ki khynnah samla shynrang bad kynthei ki ban mihkhmat ha ka Meghalaya Games 2022 ha Shillong. U la ong ruh ba u don ka jingkyrmen ba lyngba kane ka komiti kin sa ïoh ban jied ïa ki ‘rang bad ki ‘thei ba kynsai kiba leit ïa shimbynta na ka bynta ban mihkhmat ïa ka South West Khasi Hills District lyngba ka MDSA.
Ha kajuh ka por u la pynpaw ruh ba na ka liang ka MDSA ka don ruh ïa ka jingangnud kaba khraw ba kum ki nongïashimbynta na kane ka distrik ki ju poi ban ïoh ïa ki khusnam ha ki jingïashimbynta ha ki jingïamareh ne ki ‘long distant’ bad kyrmen ruh ba kine ki ban sa mihkhmat kin sa wanrah ïa u soh jong ka jingjop. “Ha kiwei pat ki jingïalehkai ngi kham duna, hynrei kyrmen ba lyngba kane ka selection camp kaba la long mynta ka sngi kin sa ïoh ban bteng ruh sa da ka coaching camp khnang ba kin khynnah kiba la shah jied kin ïoh shuh shuh ïa ki jingai jingmut kumno ban ïaleh ban poi sha ka thong”, ong u bah Y.G. Lyngdoh.
U la ïathuh ruh ba ha kane ka Meghalaya Games 2022 ka ban sa long, kum ka MDSA kan sa phah ïa ki nongïashimbynta ba nalor ka Athletics kan sa phah ïa ki nongïashimbynta sa ha ki ar tylli ki bynta kata ha ka jingïalehkai kynjatbol bad ha ka jingïasiat-khnam (Archery) kaba long Modern bad Traditional.
“Ha ka Athletics ki ban sa ïa shimbynta ki don ha ka Under-23, Under-18 bad Under-16, ha ka jingïalehkai kynjatbol ki don tang ha ka Under-23 jong ki khynnah shynrang bad kynthei bad ha ka jingïasiat-khnam (Archery) pat ki don ha ka Under-23, Under-18 bad Under-16”, ïathuh u bah Y.G. Lyngdoh. U la bynrap ruh ba ka thong ba hakhmat eh jong ka Mawkyrwat District Sports Association (MDSA) ka long ban lam lynti na ka bynta ki ‘rang bad ki ‘thei ïalehkai ba kin long kiba tbit ha ki jait jingïalehkai bapher bapher.
Namarkata, u la buh ka jingkyrpad na ka bynta ki khynnah samla kiba la shah jied ban leit ïashimbynta ba kin ai ka jingïatreilang bad ki nongpynïaid khnang ba ïa kaei kaba ki ki thmu kan sa wanrah ïa u soh jong ka jingjop ymtang ïa ki shimet, hynrei na ka bynta ka shnong ka thaw bad ka distrik hi baroh kawei. U la buh ruh ka jingkyrpad na ka bynta ki nongïashimbynta ba kin long kiba ryntih ha kiei kiei baroh haba kin sa leit ban ïa shimbynta khnang ba kan nym don kano kano ka jingshah bud-nam.