SPL 2026: Lyngba u Daman pynliem ka Mawlai ïa ka Nongkseh; Jop suk ka Langsning ïa ka Laitkor

Shillong, Nailur 02: Ka Shillong Premier League 2026 ka la wanrah ar tylli ki jingïakhun ba itynnad hynne ka sngi Balang, ha kaba ka Mawlai ka la jop da 1-0 kol pyrshah ïa ka Nongkseh katba ka Langsning, kaba bat ïa ka nam lahduh, ka la pynjemkhnap da 6-1 kol ïa ka Laitkor.
Ka jingïalehkai ha ka por janmiet ha SSA Stadium, hapdeng ka Mawlai kaba la jop arsien ïa ka nam lahduh, bad ka Nongkseh ka la long kaba ïakhaid bha tad haduh ka khyllipmat ba la jan kut, ha kaba u Damanbhalang Chyne (90’+5) u la thep ïa ka kol kaba itynnad na ka freekick ban pynjop bad pynsah ïa ka Mawlai ha ka kyrdan ba ha khlieh duh jong ka miej.
Ka Nongkseh ka la rung sha kane ka jingïakhun hadien ba shah rem da 1-0 ha ka Shillong Lajong ha ka taïew ba la dep bad ka kyrmen ban wanphai biang da ka jingjop ban pynim biang ïa ka jingïakhun jong ka ha SPL, katba ka Mawlai kam pat shah rem haduh mynta bad ka thmu ban bteng ha kane ka rukom.
Katba ka jingïakhun hashwa kane ka la long kaba pher bak-ly-bak, ha kaba ka Langsning ka la pynjemkhnap ïa ka Laitkor da 6-1 kol. U Mebanshngain Kurkalang (10’, 12’), u Damonlang Pathaw (45’), Syed Ahmed (45’+4), u Samuel L Kynshi (84’) bad u Rohan Manar (90’+4) ki la pynkhihjar na ka bynta ka kynhun kaba bat ïa ka nam lahduh, katba u Hamingbert Nongbet (54’) u la thep ïa ka shi kol na ka bynta ka Laitkor. Kane ka jingïalehkai kadei kaba la shah pynkynriah naduh ka 28 tarik u Nailar namar ka jingjur u pyrthat.
Haba phai sha ka miej kheiñ point, ka Mawlai ka lamkhmat ha khlieh duh da 10 point, ka ïaryngkat bad ka Lajong hynrei ka don ïa ka jingïapher kol (goal difference) kaba kham bha (da +7 la +4). Ka Langsning ka shong ha ka kyrdan ba lai da 9 point. Ka Nongkseh ka la hiar sha ka kyrdan ba hynriew da 4 point bad ka Laitkor ha ka kyrdan ba phra da 3 point.
Ka jingïakhun ha kane ka sngi Palei kan long hapdeng ka Sawmer pyrshah ïa ka Nangkiew Irat ha ka por 3:40 baje nohphai sngi.