Shillong, Iaiong 15 : U Myntri Rangbah ba rim ka jylla uba long ruh u Nongïalam ka Liang Pyrshah u Dr Mukul Sangma u la maham ba ka jylla Meghalaya ka lah ban kylla long kum ka Sri Lanka lada ailad biang ïa kane ka sorkar ba kan wan phai ha ka bor.
“ Nga la ju kren na ka por sha ka por ïa kane ka sorkar ba kan pynthikna ba ki paidbah kim dei ban duh ka jingshaniah ha kata ka riti synshar paidbah, namar wei ba ki paidbah ki duh ka jingshaniah kin mih bun kiei kiei ki kynrum kynram kiba lah ban ktah ïa ka shongsuk shongsaiñ ruh. Kane ka dei kaei kaba la jia ha Sri Lanka ruh bad ka daw ba la poi sha une u pud ka dei namar ka jingbam sap ba shyrkhei. Ka jingbam sap ka wanrah ka jingeh ïa ki paidbah bad ka ktah ïa ka ïoh ka kot bad kine ki dak ki shin ki ban sa jia ïa ka jylla Meghalaya ruh lada ailad ba kane ka sorkar kan wan phai biang ha ka bor” ong u Dr Mukul.
U la ai nuksa ïa kane namar ïa kiba bun ki mat la hap ban tuklar beit da ka High Court jongka jylla. “ Namar wei ba bor synshar ki la leh klet ïa kiba bun ki bynta ban synshar khadar kawei pat ka tnad jongka riti synshar paidbah ka hap ban mushlia. Na kata ka daw kiba bun ki mat kiba dei ban peit da ki bor sorkar ym shym la phai khmat bad hap ban shimti noh da ka ïing Bishar. Kan sa poi ka por ba ki paidbah ki la ngiah bad hap ban tuklar hi da kaba ïamih paidbah sha surok ruh”.
“ Phi la ïohi kaei kaba la jia ha Sri Lanka ka daw baroh ka dei ba la leh klet ïa kiei kiei baroh namar ka sorkar ka lap miet ban phai khmat sa tang sha kiei kiba pynmyntoi ïa ki” pynkut u Dr Mukul.
