Nongstoiñ, Ïaïong 15: Ki nongrep motor ka thaiñ Umyiap ha West Khasi Hills District, ki la pynpaw ïa ka jingsngewsih kaba jur halor ka jingïap ki jhur motor kaba ki la rep ha kaba ka la wanrah ruh ïa ka jingduhnong kaba khraw na ka bynta jong ki.
Halor katei ka jingïap ki jhur motor, ki nongrep ka thaiñ Umyiap ki la ud la nam ha ki dkhot bad nongïalam ka Hill Farmers Union West Khasi Hills District, ba kin ïarap lem ban thaw lad thaw lynti na ka bynta ka pynïoh lem ki lad jingïarap halor katei ka jingduhnong ka jong ki.
Na ka liang jong ka HFU hapoh ka jingïalam u Secretary u Samla Lumlang Kharsyiemlieh, ha ka sngi balang jong ka taiew ha ryngkat ki nongrep, ki la leit ban ïakynduh ïa u District Horticulture Officer ka West Khasi Hills, ban pynsngew ïa kitei ki jingeh bad ban kyrpad ruh ban pynïoh ki lad jingïarap ba kyrkieh. Na ka liang u DHO ruh u la pynpaw ba na ka liang ka tnad, kan pyrshang katba lah ban thaw ki lad ki lynti ban ïarap na ka bynta jong ki.
