Mairang, Nailur 03: Ka surok na Kynshibangla sha Parïong ka dei kaba don kam bha namar ba ki shnong kiba don ha katei ka thaiñ ki dei kiba hap ha ka Eastern West Khasi hills district bad ïa kiba bun ki kam kiba ïadei bad ki ophis sorkar ha Mairang ki paitbah na katei ka thaiñ naduh Rngisawlia, Peiñlang, Parïong, Nongdom, Rngikseh, bad kiwei kiwei ki hap ban ïaid lyngba katei ka surok.
Katei ka surok ka ïaid lyngba ruh na ki san tylli ki shnong kiba heh bha ha ka thaiñ kata ka Nongdom, Nonglait, Mawkyllei, Lawbyrtun bad Tiehnongbah.Haba ïaid lynga katei ka surok naduh Parïong haduh Kynshibangla ki don tang artylli ki jingkieng ka jingkieng kaba kham heh bad kynjang bha ka don ha ka shnong Nonglait bad kawei ka jingkieng ba siang da ki dieng ka don ha jan ka shnong Tiehnongbah.
Ha ki snem ba la dep ka jingkieng kaba don ha ka shnong Nonglait ka la synjor bha bad ka la buh jingma ïa ki kali kiba kit ïa ki nongleit nongwan hynrei hadien ba u bah Shakliar Warjri u la shah jied kum u MLA ka Mawthadraishan coinstituency bad ki paitbah ki la pynsgew ha u halor katei ka jingeh kum u nongmih khmat u la shim khia bad pynsgew sha ka sorkar ha kaba la ïoh ban pyntrei thymai ïa katei ka jingkieng.
Ha ka jingleit peit jong u nongthoh hubor jong u Mawphor kine ki khyndiat sngi u nongthoh khubor jong u Mawphor ïa ka jinglong jingman ha katei ka thaiñ ha kine iki khyndiat sngi la lap ba ka jingpyntrei ïa katei ka jingkieng ka la ïaid shait shait bad ka bynta kaba dang sah ka long satang ban pynbit pynbiang bad pynitynnad ïa katei ka jingkieng.
Kawei pat ka jingkieng kaba kham rit ha jan ka shnong Tiehnongbah ha kine ki bnai ba la dep ka la sdang ban pra hynrei ha kine ki sngi la lap ba ïa katei ka jingkieng la sdang ban moramot bad la ïoh jingtip ruh ba ha u snem ban wan ka sorkar kan mang pisa na ka bynta ban shna noh da ka jingkieng kaba bha bad kaba neh ym shuh ban siang da ki dieng.
