Shillong, K’lyngkot 27 : Ka Meghalaya ka la mad biang ka nam rem ha ka lympung ïalehkai kriket ki kynthei ka Senior Women’s One Day Trophy ha ka jingïalehkai ha ka sngi Thohdieng ha Nagpur. Ha kane ka jingïalehkai ka Meghalaya ka la rem da khyndai wicket ha ki thei ïalehkai jong ka West Bengal.
Ka Meghalaya kaba la jop ïa ka jingkynting pisa ka la kam ban tied nyngkong bad ka la ïoh ban tied baroh 50 over da kaba kamai 102 ron khyllem noh 9 wicket.
Ka Debasmita Dutta ka la kamai bun ron da 36 ron katba ka Suriti Kumari Ray ka kamai 23 ron, ka Daiaka Warjri (12 not out) bad ka Ankita Sharma (12).
Ka Bengal, kaba don ha ka kyrdan kaba lai na ka Group C, haba beh ïa katei ka ron ka la ïoh ban pyndep tang ha ki18.1 over bad duh noh tang shi wicket. Ïa katei ka shi wicket la ïoh da ka Riticia Nongbet, kaba la ïoh ban shim ïa ka wicket jong ka Mita Paul kaba dei ka kapten jong ka West Bengal kaba kamai tang 8 ron.
Ka Meghalaya ka sah satang shisien ïalehkai bad kan dei ruh ka jingïakhun kaba jwat bha ha kaba kan sa ïakhun pyrshah ïa ka Punjab ha ka sngi U Blei mynta ka taïew.
