Shillong, K’lyngkot 27 : Ka Meghalaya Car-romboard Association (MCA) ka la jied 8 ngut ki khynnah shynrang ki ban leit ïashim bynta ha ka lympung ïalehkai carroboard kaba la tip kum ka 4th Senior National Championship ba la pynlong da ka All India Carrom Board Federation ka ban sa long ha nongbah Mumbai, Maharashtra naduh ka 1 tarik haduh ka 4 tarik u Rymphang, 2023.
Haba ïakren bad ki nongthoh khubor ha ka sngi Thohdieng u General secretary ka MCA Bah Ferdinand Nongkynrih u la ai khublei ïa ki khynnah khnang ba kin wanrah ïa ka nam bad ka burom sha ka jylla Meghalaya na kane ka lympung ïakob. U la ïathuh ruh ba kine ki nongïashim bynta kin mih na la ka jong ka jylla ha ka 28 tarik Kyllalyngkot 2023.
Shuh shuh u la ïathuh ruh ba na ka liang ka Association ka kynduh jingeh ha kaba ïadei bad ka pisa ban phah ïa kitei ki khynnah hynrei na ka jingtrei shitom ki para dkhot ha kaba ki la hap ban shu shim ram.
Hynrei u la pynpaw ka jingai khublei ba lyngba ka jingkitkhlieh jong ki para dkhot ka Association ka la ïoh ban jied ïa kine ki khynnah ban leit mihkhmat ïa ka jylla sha katei ka lympung kaban long ha Mumbai.
