Shillong, Iaiong 13 : Ki pulit ka Laitumkhrah Police Station mynta ka sngi ki la ïoh ban kem ïa uwei u briew uba kyrteng u Mebanshan Snaitang namar u kam ïa lade ba u dei u Personal Assistant (PA) jong u Myntri Rangbah u Conrad K Sangma bad u Myntri ka koit ka khiah u James P.K Sangma bad kular thok ban pynïoh kam ïoh jam ïa ki samla.
Une u Mebanshan Snaitang u pynïaid ïa ka Shillong Coaching Academic Centre ha Upland Road, Laitumkhrah bad u la pynbiej ïa ki samla ban wan shah hikai ha u namar u kular ban pynïoh kam ïa ki da kaba pyndonkam ïa ka kyrteng u Myntri Rangbah bad u myntri ka tnad ka koit ka khiah.
Na ka liang ka National Peoples Youth Front (NPYF) ka tnad jong ki samla ka NPP ka la ujor da ka ejahar ha Laitumkhrah Police Station pyrshah ïa u Snaitang haba ka la ïoh jingtip ba une u pyndonkam bakla ïa ka kyrteng u myntri rangbah bad myntri ka tnad ka koit ka khiah bad kumjuh ruh ba u ju soi tuh ïa ka jingsoi jong ki ophisar sorkar tang ban pynbiej ïa ki briew.
U Snaitang u kam ruh ba u dei u dkhot ka NPYF bad u leh ïa kane tang ban ïoh pynbiej bad thok ïa ki briew khamtam ïa ki samla ba wad kam wad jam.
