Shillong, ïaïong, 13: Ka Deputy Commissioner kaba long ruh ha kajuh ka por ka Chairperson jong ka District Disaster Management Authority (DDMA) jong ka East Khasi Hills District ha ka sngi Balang ka la pyntip paidbah ba katkum ka jingmaham jong ka Indian Metrological Department kan don ka jinghap slap ha ki katto katne ki bynta jong ka District ryngkat ka lyer, ka leilieh bad u pyrthat ha ka 14 tarik bad 15 tarik mynta u bnai.
Ha kaba ïadei bad kane, ka DDMA ka la kyrpad ïa ki paidbah ban khmih bad ban pynskhem bha ïa ki tiar kiba lah ban shah rong ha ka lyer kum ki thup dieng, ki tin sop ing, ki mawit ba shong synjor, ki tin/sop thehñiut, ki sign board bad kiwei kiwei ki mar kiba lah ban shah rong ha ka por ba jur ka lyer. Lada ka jingthaba ka lehlieh ka long kaba jur bad neh slem kan bha shibun ban nym pyndonkam ne ban pynmeh ïa ki tiar elektrik kum ki mobile, isteri, radio, telebishon bad kiwei kiwei ki tiar kiba pyndonkam da ka bor elektrik.
La maham ïa ki nongshong shnong ba ki dei ban long kiba phikir ban ïada ïalade namar ka jingshlei um ka lah ban jia hadien ka jingther u lapbah khamtam ha ki jaka kiba don harud wah bad ha ki wahduid.
La kyntu ïa ki paidbah ba kin kiar na kaba jam ïa ki wah duid, ki wah bah bad ki kshaid ha ka por ba jur slap namarba ym lah ban thikna ïa ka bor jong ka bad ka um kaba jyndong bad tuid stet ka lah ban pynkyllon haba jam na shilliang sha shiliang.
DDMA ka la kyntu ïa ki paidbah ba kim dei ban tur ne niah ïa ki kali haba don ka jingshlei um bad ban kiar na ki post ielektrik ban lait na ka jingshah bat ha ka bording.
