Haba phim mynjur ïa ka MOU, ïeng pyrshah beit: ong u Dr Mukul ïa ki party synrop ka Sorkar MDA

Shillong, ïaïong, 13: U nongïalam ka Liang Pyrshah u Mukul Sangma ha ka sngi Balang u la kyntu ïa ki seng saiñpyrthei ba synrop lang ha ka Sorkar MDA ba la ïalam da ka NPP ba kin mih beit shakhmat ban pyrshah lada kim mynjur ïa ka Memorandum of Understanding ba la ïasoi da ka Sorkar Meghalaya bad ka Sorkar Assam hynrei ym ban shu long tang ki nongpyrta shla na rynsan.
“Nga la ïohi ïa ka sur kren jong ki seng saiñpyrthei kiba don hapoh ka Sorkar synrop. Nga la ïohi ïa ka jingkren ka United Democratic Party (UDP) kiba la kren pyrshah ïa ka MoU bad ki dei ban wan shakhmat ban kren ym ban shu pyrta na rynsan,” ong u Sangma haba ïakren bad ki nongthoh khubor.
Une u Myntri Rangbah barim u la ong ba ka jingïapynbeit pud ka shong ha ka rai jong ka Parliament.
Haba pynpaw ba ïa kane ka mat dei ban ïakren lyngba ka sainhima sima, u la ong, “ka dei ban wan na ka sur jong ki paidbah, na ka jingdawa ki paidbah bad ka jingkitkhlieh jong ki seng saiñpyrthei baroh kiba kam ba ki don ïa ka jingkitkhlieh bad kiba pyrta shla ba ki ju kren na ka bynta ka dawbah jong ki paidbah.”
“Ym tang u Dr. Mukul uba kren na ka bynta ka jingeh jong ki paidbah, hynrei ka dei ka kamram jong kito kiba don ha ki Seng Saiñpyrthei la ki dei kiba don hapoh ka Sorkar ban kren lane wat ki bym don hapoh ka Sorkar. Wat kito kiba sngewkhia ïa ka jingkhia ka shon jong u paidbah,” u la ong.
Shuh shuh u la kyntu ïa ki paralok kiba ïasynrop lang ha ka sorkar MDA ba ki dei ban long kiba don ka jingkitkhlieh.
U la ong ba ki seng saiñpyrthei kim dei ban shu kren tang ha ki rynsan ïalap elekshon ba ki sngewkhia ïa ka jaidbynriew hynrei katba ki kam pat kim long satia kumba ki kren.
U la ong ruh ba kane ka jingkren jong u, ka dei namarba u la ïoh ïa ka jingïam jong ki briew kiba shong basah ha khappud ki bym kwah ban shah khynniat jubor sha Assam.
Haba pynpaw ba ka Jylla Meghalaya bad Assam ki don hapoh kawei ka ri, u Mukul shuh shuh ula ong ba donkam ban sngewthuh ba ki jaka kiba la ïakren ban ïapynbeit pud ki dei kiba la buhai shnong da ki kmie kpa tymmen naduh hyndai hynthai da ki briew jong ka jylla Meghalaya kiba don ka jingkitkhlieh ban ïada bad ban pynneh pynsah ïa la ka khyndew ka shyiap.
“Ka dei ka kamram jong ngi ki nongmihkhmat ban kren ïa ka jingeh jong u paidbah. Ka jingpyrshah dohim dohïap jong ngi ka long ban pynthikna ba ka jingïasoi soskular kam dei ban long da kaba shu pynbor ïa ki paidbah jong ngi,” u la ong
Da kaba kyntu ïa ki paidbah ba kin kyntait mardor ïa ka MoU, u Mukul u la ong, “haba ngi ïakhun na ka bynta ka bha ka miat jong ki paidbah bad na ka bynta ka jylla jong ngi, ngim dei ban sangeh noh shiteng lynti, lada ngi ïakhun, ngin jop. Balei ngi ïakren ïa kane ka mat, ka daw ka long ba ki paidbah kim shym la mynjur satia wat ïa ka jingsorjamin jong ka tnat Survey of India da kaba pynshong nongrim katkum ka Notification jong ka North East Reorganization Act, 1971, ïa kaba ym lah satia ban pdiang. Mynta ki paidbah kim pdiang, namar jongno phin ïapynbeit bad na ka bynta jongno?”