Nongstoiñ, Ïaiong, 13: U Superintendent of Police jong ka West khasi Hills District u Bah BJ Laloo u la pyntip ba u Bah Parling Lyngdoh u ba shong ba sah ha Upper New Nongstoiñ, u la wan ujor ha Police Station Nongstoiñ ïa ka jingjah rngai ka khun kynthei jong u kaba la tip kyrteng kum ka samla Balarisuk Marbaniang kaba la 25 snem ka rta.
Kane ka samla ka la jah na la ïing naduh ka 17 tarik u bnai Lber 2022 khlem kano kano ka jingpyntip ha ki bahaïing hasem jong ka tad haduh mynta.
Ha kaba ïadei bad kane u Superintendent of Police u la kyrpad ïa kiba ïohi bad tip ïa katei ka samla, ba kin sngewbha ban pyntip mardor sha ki police station kiba don hapoh Meghalaya bad kiba mar khap jong ka jylla, khnang ban lap ïa katei ka samla.
Kane ka samla kaba shai ka snieh doh kadon 5 phut ka jingjrong, u Sñiuh ba iong, ka don ïa ki bniat kiba beit, ka jingkhia kumba 50 kg, bad ïa ki jaiñ ba ka phong ym lah satia ban tip.
