Shillong, K’lyngkot 17: Arngut ki Khynnah Khasi, u Forme Khongji bad u ki la mih na Shnong mynta ka sngi ban leit sha nongbah Delhi ban leit shim ïa ka khusnam Riewshlur ba la tip kum ka National Bravery Award.
Ïa kane ka khusnam la ju sam man la ka snem ha nongbah Delhi ha ka por ba rakhe ïa ka Republic Day.
U Forme Khongjee ha ka snem 2020, por ba u dang dang 14 snem ka rta u la pyllait im ïa kawei ka khynnah kynthei kaba na ka Shnong Umkrem, Riwar Mihngi ha ka jinglat lat jong ka wah kaba don ha katei ka Shnong hi. Ha katei ka snem ha ka por ba dang khang dam, u Forme bad kiwei ki para khynnah ki la leit sum ha katei ka wah. Hynrei namar ka jingheh ka um ba dang shu dep slap, kane ka khynnah ka la btuit bad hap sha wah. Ka um kaba ka rong ïa kane ka khynnah kumba 25 meter eiei bad ki para khynnah ki la shu peit da ka jingtieng. Pynban u Forme u la ryngkoh beit pum sha wah ban leit ban pyllait im ïa kane ka khynnah.
Une u khynnah uba smat ruh ban ïalehkat phutbol bad ieit ïa u Christiano Ronaldo, u la ju pyllait im ruh ïa ki nongjngohkai pyrthei kiba poi sha Umkrem ban wan peit ïa ka Kshaid ba don ha katei ka Shnong.
Uwei pat u khynnah Samla ba la leit ban shim ïa kane ka khusnam udei u Wanlambok Rani na ka Shnong Unden Mission, Ribhoi, u la pyllait im ïa ki arngut ki shipara bad i kmie jong u na ka wah Umïam kaba tuid najan ka Shnong jong ki, ha ka por ba ki la jan ngam jyllop katba ki dang sum ha katei ka wah.
Kane ka jingsam khusnam ka la poi shaduh mynta ka snem kadei namar ka jingpynwit ka jingpang COVID 19 ha kine ki snem kiba ladep.
Kine ki khynnah ryngkat ka jingsynran u Bah Alfond Kharsyntiew, ki la poi ha nongbah Delhi ha kaba kin ïakynduh ïa u President bad Prime Minister ka ri India ha ka sngi ba sam ïa ka khusnam. Ha jingrakhe ïa ka Republic Day ki ju ïoh ban shong da u Hati ha ka jingïaid Parade.
